Hlăm 2 hruê êgao, ti lu krĭng mơ̆ng čar Kon Tum mâo adiê hjan man dưn truh kơ hjan prŏng. Čar Kon Tum mtă kơ bruă knŭk kna dŭm kdriêk, ƀuôn prŏng mbĭt hŏng dŭm êpul djŏ tuôm ksiêm dlăng klei mâo yan adiê, krơ̆ng kjăp êpul dôk gak răng, pral ksiêm dlăng, mkra mlih dŭm hdră mdrơ̆ng hŏng klei yan adiê ngă. Ba nao êpul, kdrăp mnơ̆ng kăp mdrơ̆ng, msir mghaih klei amâo jăk tăm bluh mâo. Ksiêm dlăng klă klơ̆ng krĭng ƀuôn sang dôk, dŭm hdră phŭn, pral hmao ƀuh anôk huĭ luič klei êđăp ênang, mkăp êpul, kdrăp mnơ̆ng, pral mâo hdră mbĕ mnuih ƀuôn sang đuê̆ mơ̆ng krĭng huĭ hyưt, rơ̆ng kjăp klei suaih pral, bi hrŏ tuič hnơ̆ng klei luič liê ngăn drăp Knŭk kna lehanăn mnuih ƀuôn sang.

Knơ̆ng bruă sang čư̆ êa čar Gia Lai mâo leh hră mtrŭn mjêč kơ bruă mdrơ̆ng hŏng adiê hjan prŏng, kluh lăn hlăm čar. Čar mtrŭn asăp mkŏ mjing êpul ba anăp ksiêm dlăng dŭm anôk jing ênưih mâo klei amâo mâo jăk, alŭ wăl anôk mnuih ƀuôn sang dôk djiêo hnoh krông. Mbĕ mnuih ƀuôn sang kơ anôk êđăp ênang. Tiŏ nao mnuih gak răng, pơ̆ng mdhă ghă klei găn êrô hlăm dŭm êlan êa mlai, anôk êa đoh êtăng, Mprăp mnuih lehanăn mnơ̆ng dhơ̆ng pioh mghaih msir klei amâo mâo jăk truh, rơ̆ng kơ klei êrô êbat êđăp ênang. Mâo hdră răng mgang jăk mnơ̆ng pla mjing, răng mgang alŭ wăl duh mkra, alŭ wăl ƀuôn prŏng, lehanăn dŭm anôk mă mnơ̆ng hlăm gŭ lăn, boh nik hlăm dŭm anôk jing huĭ hyưt ênưih mâo klei truh. Dŭm boh knơ̆ng kdơ̆ng êa, bi ksiêm kjăp hnơ̆ng adiê hjan, lehanăn hnơ̆ng êa đĭ hlăm knơ̆ng êa, čiăng mâo hdră pŏk phưi êa bi djŏ guôp./.