Leh sa mlan bruă sang čư̆ êa mrâo mă bruă, snăn anôk bruă ngă hră mơar ƀuôn hgŭm Mang Yang mă bruă hŏng klei pral. Phung knuă druh, mnuih mă bruă tŭ mă, lehanăn ngă hră mơar, wĭt lač klei êmuh lehanăn ktrâo atăt kơ mnuih ƀuôn sang klei ngă hră mơar. Võ Lê Xuân Thiện – Khua knơ̆ng bruă sang čư̆ êa să   Mang Yang, brei thâo hră mơar lu mta, ƀiădah knuă druh ăt mă bruă hŏng klei jăk.

 “Ênoh hră mơar ba ngă lu hĭn, êbeh kơ 1.000 hră mơar. Ƀiădah ăt mâo mghaih msir djŏ wưng kčah, mnuih ƀuôn sang mâo klei mơak. Phŭn tal êlâo dơ̆ng mă bruă, êjai dôk ngă bruă lehanăn mđing kơ hdră mă bruă mrâo êjai kñăm bi djŏ”.

Leh sa mlan mă bruă anôk bruă sang čư̆ êa dua gưl, dŭm anôk bruă ngă hră mơar ti Gia Lai mâo mă bruă leh hŏng klei hơĭt, ngă hŏng klei jăk. Phung knuă druh, mnuih mă bruă gĭt ktĭr, pral dưi thâo hlăm hdră êlan mă bruă mrâo, hŏng ênoh bruă knuă jing prŏng dah mkă hŏng êlâo dih.

Tui si klei bi êdah mơ̆ng anôk bruă ngă hră mơar ala čar hrue 1/8, čar Gia Lai dôk tal 3/34 boh čar, ƀuôn prŏng kơ ênoh klei ngă hră mơar, hŏng 76,86 puăng. Mbĭt hŏng anăn, čar ăt dăp dôk tal 6/34 kơ ênoh hră mơar lŏ mâo mrâo, lehanăn mâo tŭ mă, lehanăn dưi mghaih msir, jih jang truh 128.246 hră mơar, hlăm anăn lu jing mnuih ƀuôn sang ngă hŏng online truh 76,9%.

Lê Dũng Linh – Khua adŭ bruă mđĭ mlih lehanăn kiă kriê bruă ngă hră mơar, adŭ bruă knơ̆ng bruă sang čư̆ êa čar Gia Lai – brei thâo, hlăm wưng tinăp, čar srăng lŏ dơ̆ng mđĭ hĭn bruă ba yua kdrăp mă bruă thâo mĭn, pioh đru kơ knuă druh, lehanăn lŏ mjuăt bi hriăm, kñăm kơ bruă sang čư̆ êa dua gưl dưi mă bruă jăk hĭn:

 “Hmei srăng lŏ dơ̆ng mjuăt bi hriăm kơ hdră mghaih msir jih jang bruă knuă, nao mđrĭng anăn mâo klei bi trông plah wah čar hŏng nah gŭ čiăng mghaih msir jih klei dleh dlan, klei gun kpăk. Leh klei mjuăt bi hriăm, snăn čar lŏ ksiêm wĭt bruă mơ̆ng dua nah. Tal sa jing hdră mă bruă hŏng online, tal dua jing tiŏ nao êpul ksiêm dlăng. Mă mơ̆ng boh tŭ dưn anăn, srăng lŏ dơ̆ng mjuăt bi hriăm đru kơ djăp alŭ wăl adôk mtŭk mtŭl hlăm klei mă bruă. Klei anei, srăng ngă nanao hlŏng jih thŭn 2025. Hlăm thŭn 2026 sĭt nik srăng mâo yơh klei hrŏng ruah mnuih mă bruă.”

Anăp anei, Gia Lai srăng bi leh jih jang bruă mơ̆ng čar hlŏng kơ dŭm boh ƀuôn hgŭm. Mđĭ bruă mbha gưl mâo 1.060 bruă čuăn jao kơ ƀuôn hgŭm. Knơ̆ng bruă sang čư̆ êa car brei leh dŭm alŭ wăl mâo djăp klei găl, mkŏ mjing êpul êya ngă djăp mta bruă mâo: Kiă kriê bruă duh bi liê, rŭ mdơ̆ng, bruă čiu hnô mghaih msir anôk ala, mđĭ kyar bruă anôk ala, bruă mkăp êa, lehanăn lu bruă kơ klei hdĭp mkăn.

Phạm Anh Tuấn- Khua knơ̆ng bruă sang čư̆ êa čar Gia Lai brei thâo, čiăng dưi păn kjăp jih klei gun kpăk hlăm nah gŭ, anăp anei čar srăng đru kơ grăp boh ƀuôn hgŭm mơ̆ng 1–3 êklai prăk pioh duh bi liê, mđĭ anôk mă bruă, mâo hdră êlan đru kơ phung knuă druh mrâo tiŏ hriê mă bruă, nao mđrĭng hŏng bruă mjuăt bi hriăm, lehanăn ksiêm dlăng hdră êlan tiŏ nao mnuih mă bruă mơ̆ng čar truh kơ dŭm boh ƀuôn hgŭm adôk dleh dlan, kñăm dưi mă bruă hŏng klei tŭ dưn pral hlăm klei ngă hră mơar.

 “Lač kơ bruă sang čư̆ êa dua gưl, mđing duh bi liê tal êlâo jing klei mă bruă kơ mnuih ƀuôn sang, lehanăn phung duh mkra, snăn jing ti anôk ngă hră mơar brei bi sa hnơ̆ng, mâo hnơ̆ng jăk, mâo ai tiê mă bruă djŏ. Tal dua jing thâo jĕ giăm hŏng mnuih ƀuôn sang, thâo săng mđing hmư̆ ai tiê mnuih ƀuôn sang, lehanăn pral mghaih msir mtam ya jing bruă djŏ kơ mnuih ƀuôn sang lehanăn phung duh mkra. Jih jang bruă mơ̆ng čar lehanăn dŭm alŭ wăl bi mlih hdră êlan mă bruă, bi ksiêm dlăng klei mă bruă, hŏng jih ai tiê, hŏng klei hur har mă bruă kơ mnuih ƀuôn sang, lehanăn phung duh mkra jing tal êlâo, mjing nanao klei găl kơ mnuih ƀuôn sang lehanăn kơ phung duh mkra”.

Khădah ăt adôk lu klei dleh dlan gun kpăk, mâo lu mta bruă lŏ bi mlih, ƀiădah boh tŭ dưn tal êlâo hlăm bruă sang čư̆ êa ƀuôn hgŭm ti Gia Lai brei ƀuh hlăk dôk ngă djŏ hdră. Mbĭt hŏng anăn mơ̆ng nah gŭ, mâo bruă klam truh hlăm grăp čô mnuih, grăp êpul êya, lŏ mđrăm mbĭt, siă suôr mơ̆ng knơ̆ng bruă sang čư̆ êa čar. Mơ̆ng anăn, klei mă bruă ti dŭm boh ƀuôn hgŭm hlăk dơ̆ng mâo boh tŭ dưn klă mngač hlăm grăp hrue, ƀrư̆ ƀrư̆ đuĕ nao hlăm klei kjăp êjai kiă kriê alŭ wăl./.