Mjưh ruê̆ 120 mnĭt bi lông klei hriăm Ngữ Văn aguah, lu phung hđeh kbiă mơ̆ng adŭ bi lông hŏng klei jăk. Lu phung hđeh lač akŏ klei bi lông thŭn anei dôk hlăm klei leh hriăm, kdrêč răk lehanăn thâo săng ênưih ngă lehanăn klei bi lông nghị luận văn học mâo lu mta mrâo hŏng phung hđeh.

Lu anôk bi lông ti Dak Lak, phung hđeh leh ngă klei bi lông Ngữ văn ƀuh jăk ai tiê sơaĭ. Lu phung hđeh lŏ mnêč bi yăl dliê kơ akŏ klei bi lông hŏng ƀĭng găp êlâo kơ wĭt mdei, mprăp kơ klei bi lông tlam jing Toán. Hdră mkŏ mjing klei bi lông ti čar Dak Lak dưi hluê ngă kjăp, rơ̆ng klei êđăp ênang, mjing klei găk kơ phung hđeh mŭt hlăm dŭm klei bi lông ti anăp ba wĭt boh tŭ dưn./.