Ênoh bi liê jih jang mơ̆ng 7 sang hră Knŭk kna rông ba mlir gưl hriăm gưl 1 leh anăn gưl 2 dŭm să knông lăn nah yŭ čar Gia Lai jing êbeh 1.500 êklai prăk, dưi rŭ mdơ̆ng ti ênhă êlan kluôm jing giăm 52ha. Čar mdưm mta kñăm bi leh leh anăn ba jao 7 sang hră anei êlâo kơ hruê 31/7/2026. Khădah sơnăn, ƀiădah mrâo knŏng mâo 1 bĭt sang hră Ia Puč djăp ênoh čuăn hdră kčah, bi 6 bĭt adôk jing êmưt mkă hŏng hdră kčah êlâo anăn. Phŭn agha kyua anôk bruă đru kčĕ klei rŭ mdơ̆ng êmưt, kƀah mnuih mă bruă, mbĭt hŏng ênoh mnơ̆ng yua mkŏ mkra đĭ yuôm hlăm wưng giăm anei.

Hlăm klei ksiêm dlăng boh sĭt, Khua bruă Đảng čar Gia Lai Thái Đại Ngọc mñă kơ phung duh bi liê leh anăn phung ngă bruă lŏ iêo jăk thiăm mnuih mă bruă, msir klei dleh dlan čiăng mtrŭt bi pral klei ngă bruă. Dŭm knơ̆ng, dhar bruă bi mguôp ruh mgaih klei dleh dlan kơ mnơ̆ng yua mkŏ mkra, rơ̆ng kơ hdră bruă dưi bi lie leh anăn dưi ba yua hlăm thŭn hriăm mrâo. Mbĭt anăn ksiêm dlăng, bi mbŏ dŭm mta mkăn kñăm rơ̆ng boh tŭ dưn kơ hdră bruă, kñăm kơ ana kyâo mtah, sang dôk kơ phung nai leh anăn hđeh sang hră, mbĭt hŏng kdrăp msir djah djâo găl guôp.