Hlăm 10 thŭn êgao dŭm êpul bruă êdam êra čar Gia Lai bi hgŭm hlue ngă êbeh 1.500 hdră, kdrêč bruă phung êdam êra mkŏ mkra krĭng ƀuôn sang mrâo, ƀuôn prŏng jăk siam; mkŏ mjing giăm 200 bruă ngă “Knăm mơak phung aê mdrao mda asei hlue ngă asăp Awa mtă”, ksiêm mkă, mbha êa drao amâo mă prăk kơ êbeh 50 êbâo čô êdam êra, hđeh điêt leh anăn phung mâo klei hdĭp dleh dlan. Mđĭ lar boh tŭ 110 gru hmô ƀuôn êdam êra “2 klei amâo mâo, 2 mta mâo”, hlăm anăn kƀĭn hlăm bruă ngă ti dŭm să gĭr ktưn truh hdră kñăm krĭng ƀuôn sang mrâo leh anăn dưi mâo lu boh tŭ êdah êdi… Bruă bi lar gru hmô êdam êra êdah êdi tui hriăm leh anăn hlue ngă klei Awa mtă dưi pŏk ngă lar ƀar, mjing boh kdrŭt kơ phung êdam êra, hđeh điêt Gia Lai gĭr ktưn hriăm hră, mă bruă knuă.

Tlam mbruê, bruă êdam êra čar Dak Nông mkŏ mjing klei pah mni êdam êra êdah êdi hluê ngă asăp Awa leh anăn đảng viên mda asei êdah êdi. Dŭm thŭn êgao, bruă hluê ngă gru mngač Hồ Chí Minh mâo dŭm gưl bruă êdam êra ngă hŏng lu klei bi hmô, hdră êlan mbruă, tŭ dưn. Hluê anăn, ƀrư̆ mâo lu hĭn phung êdam êra êdah êdi, dŭm gru hmô mda asei, mâo klei mĭn hdĭp jăk, nao êlâo hlăm klei hriăm, mă bruă knuă leh anăn duh myơr kơ yang ƀuôn. Hlăm knăm, Bruă êdam êra čar Dak Nông bi mni leh 28 čô êdam êra hluê ngă asăp Awa Hồ leh anăn 17 čô đảng viên mda asei čar Dak nông wưng thŭn 2023 – 2025. Anei jing phung mâo boh tŭ dưn hlăm klei hriăm hră mơar, mă bruă knuă, ksiêm duah klei kreh knhâo, mlih mrâo mbruă, čô̆ kơ bruă, mkŏ mkra krĭng ƀuôn sang mrâo leh anăn nao hgŭm hlăm bruă êdam êra, bruă êpul.