Anei jing klei hưn dưi ba mdah hlăm Klei kƀĭn trông ksiêm wĭt hdră êlan ngă bruă mrô 64 thŭn 2018 mơ̆ng Êpul khua bruă Đảng čar Gia Lai mkŏ mjing aguah mbruê 29/11. Klei hưn hlăm klei kƀĭn trông brei ƀuh, mơ̆ng thŭn 2015 truh kơ ară anei, čar Gia Lai ngă leh bruă dăp wĭt, bi mŭt mbĭt leh anăn kruh ruh dŭm anôk bruă knŭk kna ngă bruă hơăi mang amâodah ngă bruă mâo leh anôk mkăn ngăn msĕ. Boh tŭ, čar khăt bi hrŏ leh 189 anôk bruă knŭk kna, knar hŏng 17,5%.

Truh kơ knhal jih mlan 6/2024, hlăm čar adôk 891 anôk bruă knŭk kna. Hlăm bruă mtô mjuăt bi hriăm – mâo hnơ̆ng lu hĭn hlăm jar bruă knŭk kna – čar bi hrŏ leh 86 sang hră hđeh điêt leh anăn gưl 3, mbĭt hŏng 406 sang hră mơar. Bi kơ bruă mdrao mgŭn, čar lŏ mkŏ mjing dŭm anôk bruă mdrao mgŭn kdriêk, ƀuôn prŏng, bi hrŏ 24 anôk bruă. Dŭm anôk bruă dhar kreh, mjuăt asei mlei ăt dưi dăp bi khuăt, bi hrŏ êbeh 39% anôk bruă gưl kdriêk. Hŏng klei gĭt ktưn ngă jăk dŭm hnơ̆ng čuăn mơ̆ng gưl dlông, čar Gia Lai ăt bi leh bruă bi klă dŭm hdră êlan bi hrŏ phung mă bruă knŭk kna leh anăn lŏ dăp wĭt anôk bruă knŭk kna. Čar ăt hluê ngă dŭm hdră êlan kñăm mtrŭn mđĭ bruă dăp mrâo leh anăn mlih mrâo bruă mkŏ mjing, rơ̆ng mâo boh tŭ dưn leh anăn amâo mâo hmăi kơ hnơ̆ng tŭ jăk bruă knŭk kna.