“Gĭr hlue ngă jăk hdră duh bi liê knŭk kna thŭn anei kñăm đru dưi mâo klei kñăm đĭ kyar 8%. Anei jing klei K’iăng Khua knŭk kna Mai Văn Chính mtă hlăm klei bi kƀĭn online mơ̆ng Êpul mă bruă mrô 7 kơ klei ksiêm dlăng, ruh mgaih klei dleh dlan mđĭ prăk bi liê knŭk kna thŭn 2025 mơ̆ng 5 čar krĭng Lăn Dap Kngư. Hlăm klei bi kƀĭn dŭm alŭ wăl hưn leh anăn bi mklă klei dleh dlan, gun kpăk, mta phŭn leh anăn klei kčĕ msir hŏng dŭm hdră bruă bi liê knŭk kna.

Blŭ hrăm hlăm klei bi kƀĭn, K’iăng Khua Knŭk kna Mai Văn Chính lač, thŭn anei jing thŭn čiăng mđĭ klei êdah êdi, hlue ngă hdră kčah 5 thŭn 2021-2025, hŏng klei gĭr đĭ kyar mơ̆ng 8% kơ dlông. Lač klă, Khua knŭk kna mđing gĭt gai, bi êlam kơ klei duh bi liê knŭk kna, K’iăng Khua knŭk kna brei thâo, mrâo êgao Knŭk kna mkŏ mjing leh 7 êpul mă bruă păn kjăp boh klei pŏk ngă, mbha prăk bi liê, msir mgaih bi liê knŭk kna. Hlue si K’iăng Khua knŭk kna bruă klam mơ̆ng ară anei truh knhal jih thŭn srăng kjham hĭn, 5 čar krĭng Lăn Dap Kngư brei lŏ dơ̆ng mđĭ bruă kđi čar ngă bruă hlăm klei mkŏ mjing bi jăk leh anăn tŭ dưn. Mơ̆ng anăn đru mguôp hlăm klei đĭ kyar bruă duh mkra ala čar, mâo klei kñăm đĭ kyar 8% hlăm thŭn anei.