Dŭm pluh čô hriăm gưl prŏng hlăm leh anăn êngao čar Dak Lak, dôk nao hgŭm hlăm dŭm mta bruă yang ƀuôn ti să knông lăn Ea Rôk leh anăn Ia Lôp, čar Dak Lak, mbĭt anăn ngă lu hdră bruă, kdrêč bruă ti alŭ wăl. Êpul 45 čo hriăm gưl prŏng mơ̆ng Sang hră gưl prong Dhŭng Cần Thơ bi mguôp hŏng phung êdam êra alŭ wăl ngă dŭm mta bruă tŭ dưn msĕ si: mđo brei hdruôm hră hriăm kơ phung hđeh sang hră gưl 1, mkŏ mjing anôk hlăp lêñ leh anăn anôk hriăm kơ phung hđeh, mđung brei loa kơ sang kƀĭn ƀuôn. Êngao kơnăn, đŭm êtuh blah hla čhiăm gru lăn čar dưi mđup brei kơ mnuih ƀuôn sang, dŭm êbâo hnư mnơ̆ng ƀơ̆ng mơĭt kơ phung hđeh điêt leh anăn phung mduôn dôk hjăn. Mă hnư mnơ̆ng leh anăn kdrăp yua hriăm hră kơ anak êkei dơ̆ng nao hriăm adŭ 4, Huỳnh Thị Cẩm Tú, ti alŭ Dự, să Ia Lôp, čar Dak Lak, mgei ai tiê:

“Tinei jing krĭng taih kbưi kyuanăn êjai mâo mă dŭm hnư mnơ̆ng sơnei jing hơ̆k mơak êdi, phung hđeh ăt hơ̆k mơak leh anăn mgei ai tiê mơh. Lač jăk kơ phung hriăm gưl prŏng kyua mơ̆ng kbưi hriê tinei mđup brei kơ phung hđeh dŭm hnư mnơ̆ng yuôm bhăn”.

Amâo djŏ knŏng dŭm mta mnơ̆ng yua, êpul ngă bruă lŏ ngă klei hâo hưn hdră bhiăn lăn čar kơ klei gang mkhư̆ klei ngă măk bai, ma tuĭ leh anăn klei tlĕ čhĭ mnuih, đru mđĭ klei thâo săng, klei thâo čŏng răng mgang kơ mnuih ƀuôn sang ti krĭng knông lăn. Hŏng ênoh prăk mkŏ mjing dŭm mta bruă êbeh 300 êlăk prăk. Pô hriăm gưl prŏng, Mai Huỳnh Đặng, jing sa čô hgŭm ngă brei thâo, sa hruê kăm mă bruă amâo mâo sui ôh, ƀiădah dưi bi mâo dŭm gru kruăk dleh wơr hŏng mnuih ƀuôn sang krĭng knông lăn hŏng grăp čô hriăm gưl prŏng.

“Hĭn kơ klei hmei hmăng hmưi leh anăn mprăp leh êlâo anăn. Kyua kâo ăt tuôm mâo klei hriăm hlăm hdră bruă yan mdei mtah ti Lăn Dap Kngư, ƀiădah tal anei mâo lu klei mgei ai tiê hĭn. Leh hdră bruă anei kâo srăng mâo lu klei hriăm mrâo, klei hriăm hlăm gưl kơ bruă kơ anăp, đru kơ kâo đĭ hriê kơ prŏng kơ dŭm mta bruă hlăm yang ƀuôn”.

Ti ƀuôn hgŭm Hoà Phú, čar Dak Lak, êbeh 500 čô knuă druh, lĭng kahan Trung đoàn 584 9 knơ̆ng gĭt gai lĭng kahan čar Dak Lak mbĭt hŏng lu phung êdam êra mrâo trŭn kơ bruă hdră bruă yan mdei thŭn 2025 hluê si hdră êlan mơ̆ng knơ̆ng gĭt gai lĭng kahan čar leh anăn dhar bruă mặt trận čar. Hlăm hdră bruă sui 45 hruê, knuă druh, lĭng kahan leh anăn phung êdam êra dŭm să Hòa Phú, Ea Kiết leh anăn ƀuôn hgŭm Tân Lập (čar Dak Lak) hrăm mbĭt ngă bruă mkra mđĭ êlan klông ƀuôn sang, pla kyâo mtah, mkŏ mjing hdră bi mguôp lĭng kahan – mnuih ƀuôn sang, sang dôk kơ gŏ sang knŭk kna dlăng ba,k bi doh alŭ, ƀuôn leh anăn đru kơ mnuih ƀuôn sang mlih mrô, ngă hră mơar knŭk kna leh bi mŭt mbĭt. Nao hlăm hdră anei, Đại úy Phan Thanh Tài, Tiểu đoàn 303 - Trung đoàn 584 brei thâo, hdră bruă kčưm mơ̆ng hruê anei truh jih hruê 30/85, mĭn tĭng mkra mđĭ 150 boh sang đru kơ phung knŭk kna dlăng ba, mkra mđĭ êbeh 90kim êlan klông, pla dŭm êbâo phŭn kyâo mtah ti dŭm ƀuôn hgŭm mrâo:

“Gưl 1 thŭn 2025, hmei dưi iêo jak êbeh 100 čô knuă druh, lĭng kahan čiăng ngă dŭm mta bruă ti 3 ƀuôn hgŭm, ngă bruă bi hluh êa êa khăt, bi doh anôk mă bruă, đru kơ dŭm gŏ sang knŭk kna dlăng ba hŏng lu mta phŭn klă klơ̆ng…Hluê anăn đru mkŏ mjing klei bi mguôp, mkŏ mjing tur knơ̆ng kjăp čiăng kơ hmei bi leh bruă klam răng mgang klei êđăp ênang”.

Ăt nao hlăm hdră gưl anei ti ƀuôn hgŭm Hoà Phú, čar Dak Lak, phung êdam êra alŭ wăl ăt hur har ngă dŭm mta bruă msĕ si bi doh wăl hdĭp mda, đru kơ mnuih ƀuôn sang mlih mrô, mtô ngă hră mơar knŭk kna điện tử. Lê Dương Bá Ước,, k’iăng khua dhar bruă mặt trận ƀuôn hgŭm Hoà Phú klam bruă êdam êra brei thâo: Khădah alŭ wăl mrâo bi mŭt mbĭt, bruă knuă lu, ƀiădah hŏng êpul êdam êra ba anăp, hrăm mbĭt hŏng lĭng kahan hlăm bruă čung ba mnuih ƀuôn sang leh anăn mkŏ mkra krĭng ƀuôn sang mrâo.

"Êpul bruă êdam êra să bi mguôp hŏng Trung đoàn 584 đru hruê ai kơ mnuih ƀuôn sang wiă mdiê, kphê hŏng tiu hlăm yan. Êngao kơnăn, hmei lŏ ngă dŭm hdră bruă jing klei bi hmô huôm djah ti alŭ 8, să Hoà Khánh hđăp.”

Dŭm mta bruă klă klơ̆ng hlăm hdră bruă yan mdei prŏng thŭn 2025 ti Dak Lak amâo djŏ knŏng bi êdah ai tiê bruă klam, klei hur har mơ̆ng phung mda asei ƀiădah lŏ đru bi hơĭt klei hdĭp mnuih ƀuôn sang krĭng knông lăn, krĭng tlaih kbưi. Mơ̆ng dŭm hnư mnơ̆ng điêt, dŭm hdră bruă yang ƀuôn truh kơ bruă čung ba mnuih ƀuôn sang, jih jang dưi bi lar ktang klei hưn, bi mguôp plah wah phung hriăm gưl prŏng, lĭng kahan leh anăn mnuih ƀuôn sang.