Amai Phạm Thị Phương Đông – pô ngă bruă tĭng yap Sang hră gưl sa Y Ngông, wăl krah Ƀuôn Hồ, čar Dak Lak  5 thŭn hdĭp hŏng klei ruă boh ƀleh. Mă bruă ti sang êa drao êjai, grăp gưl nao mdrao klei ruă boh ƀleh ti Sang êa drao prŏng wăl krah Ƀuôn Hồ, ñu jing pô mđĭ ai tiê hlăm gŏ sang điêt mâo ung ngă bruă lŏ hma leh anăn nao mă bruă ti anôk kbưi. Mâo hră mkiêt mkriêm 5 êklăk prăk mơ̆ng hdră “Kmŭt mniă kñĭ”, amai Đông mgei ai tiê brei thâo:

“Hră mkiêt mkriêm kmŭt mniă kñĭ anei đru kơ kâo lu snăkl kâo dưi blei êa drao, kyua anăn kâo mni lač jăk lu snăk. Mơ̆ng anăn kâo pô dưi ƀiă klei dleh dlan, mâo boh kdrŭt dưi hŏng klei ruă duam”.

 Klei yăl dliê kơ gŏ sang đảng viên Y K’Lơn Niê ti ƀuôn H’Né, să Ea Yông ăt jing klei bi mklă kơ boh tŭ klă sĭt mơ̆ng hdră “Hră mkiêt mkriêm kmŭt mniă kñĭ”. Hŏng dua čô anak điêt dôk nao sang hră, ung mô̆ diñu knŏng mâo mă 2 sào lŏ leh anăn lăn điêt pla mjing kphê. Klei ktrŏ kơ bruă duh mkra ngă kơ ayŏng Y K’Lơn nao mă bruă mưn ti anôk kbưi, bi amai H’Puê Niê –mô̆ ñu- mă bruă kbưi hŏng sang 10 km. Thŭn 2024, gŏ sang ñu mâo bruă Đảng wăl krah Ƀuôn Hồ mđup brei hră mkiêt mkriêm mâo ênoh 12 êklăk prăk. Mơ̆ng  ênoh prăk anei, amai H’Puê blei 4 drei ŭn mjeh. Leh 4 mlan kriê dlăng, gưl ŭn tal êlâo ba 24 êklăk prăk. Kyua anăn, gŏ sang ñu mâo klei găl lŏ dơ̆ng pŏk mlar bruă rông ŭn, hơĭt klei hdĭp mda.

“Kâo bi mni kơ diñu đru kâo leh kâo bruă rông ŭn. Klă klơ̆ng jing bruă Đảng wăl krah đru leh hră mkiêt mkriêm “Kmŭt mniă kñĭ” hŏng ênoh prăk 12 êklăk prăk kơ gŏ sang kâo blei rông ŭn. Gru hmô rông ŭn anei djŏ guôp hŏng boh klei gŏ sang hmei. Êdei anei, gŏ sang hmei srăng lŏ dơ̆ng mđĭ kyar bruă rông ŭn čiăng klei hdĭp hơĭt hĭn”.

Ti tluôn dŭm pŏk hră mkiêt mkriêm anăn jing klei hrăm mbĭt hgăm ƀiădah kjăp mơ̆ng grăp čô knuă druh, đảng viên. Amai Nguyễn Thị Trúc dôk mă bruă ti Anôk bruă hâo hưn mtô mblang leh anăn Čung ba mnuih ƀuôn sang Wăl krah Ƀuôn Hồ brei thâo, grăp čô hlăm anôk bruă čŏng mkiêt mkriêm, mâo đa đa 5 êklăk prăk, 3 êklăk, amâodah knŏng dŭm êtuh êbâo prăk, tui hlue si klei găl grăp čô mnuih, čiăng kơ drei hrăm mbĭt đru kơ phung mâo klei hdĭp dleh dlan.

“Kâo ƀuh hdră anei jing yuôk bhăn snăk, bŏ hŏng klei khăp. Hlăm hdră hmei đru mguôp mnơ̆ng dhơ̆ng wăt tơdah điêt snăk ƀiădah mâo lu klei yuôm bhăn hŏng đảng viên mâo klei hdĭp dleh dlan, leh anăn ăt mơ̆ng hdră anei, phung đảng viên mâo klei hdĭp dleh dlan thâo ngă bruă duh mkra, tlaih ƀun leh anăn gĭr ktưn.”

Nguyễn Văn Út –  Khua Anôk bruă hâo hưn mtô mblang leh anăn čung ba mnuih ƀuôn sang  Wăl krah Ƀuôn Hồ, čar Dak Lak brei thâo, gru hmô “Hră mkiêt mkriêm kmŭt mniă kñĭ” dưi pŏk ngă mơ̆ng thŭn 2023, hlăm ai tiê tui hriăm leh anăn hlue ngă klei Awa Hồ mtô, hdĭp mkiêt mkriêm leh anăn bi kah mbha. Knuă druh, đảng viên đru mguôp čiăng mkŏ mjing keh, đru kơ phung đảng viên tuôm hŏng klei dleh dlan, boh nik jing phung đảng viên mnuih djuê ƀiă, hdĭp mda ti krĭng taih kbưi. Nguyễn Văn Út brei thâo:

“Klei mdê hjăn hlăm hdră mđup brei snăn mâo 3 ƀuôn jing ƀuôn Tring 1,2,3 ti ƀuôn hgŭm An Lạc, tinăn mâo đảng viên jing mnuih djuê ƀiă mâo klei hdĭp dleh dlan ƀiădah diñu hngah mă hră mkiêt mkriêm anei kyua diñu akâo brei mđup brei kơ phung đảng viên jing mnuih djuê ƀiă ti să mkăn adôk dleh dlan hĭn. Mơ̆ng bruă hriăm hră leh anăn hlue ngă klei Awa mtă, hŏng ai tiê phung knuă druh đảng viên bi khăp, bi đru hdơ̆ng pô mjing leh klei lar bra hlăm phung knuă druh đảng viên  mơ̆ng kluôm wăl krah.”

Knŏng 2 thŭn pŏk ngă, kluôm wăl krah Ƀuôn Hồ mđup brei 175 Hră mkiêt mkriêm kmŭt mniă kñi hŏng ênoh 769 êklăk prăk. Dŭm hră anăn đru kơ phung đảng viên bi liê mkra mjing, blei ana mjeh, mdrao klei ruă leh anăn hơĭt klei hdĭp mda. Grăp pŏk hră amâo djŏ knŏng mâo ênoh kơ mnơ̆ng dhơ̆ng ôh, ƀiădah lŏ jing klei mđĭ ai yuôm bhăn, thiăm ai ktang čiăng gĭr ktưn hlăm klei dleh dlan. H’Blă Mlô, K’iăng Khua dlăng bruă đảng wăl krah Ƀuôn Hồ, čar Dak Lak, brei thâo:

“Gru hmô anei lar bra truh hŏng phung dưi dưn ăt msĕ mơh êpul bruă Đảng, đảng viên hlăm klei tui hriăm, hlue ngă klei mĭn, knhuah mngač Hồ Chí Minh. Leh dăp anôk bruă knŭk kna, ya bruă mâo Anôk dlăng bruă Đảng  wăl krah ngă leh jăk hlăm wưng êgao srăng mâo dŭm să, ƀuôn hgŭm pŏk hlue ngă, čiăng kơ gru hmô anăn srăng truh hŏng phung đảng viên mâo klei hdĭp dleh dlan.”

 Grăp pŏk “Hră mkiêt mkriêm kmŭt mniă kñĭ” jing sa klei bi mklă jăk siam kjơ ai tiê bi hgŭm, bi kah mbha leh anăn đua klam hlăm êpul knuă druh, đảng viên Wăl krah Buôn Hồ, čar Dak Lak. Amâo djŏ knŏng đru kơ mnơ̆ng dhơ̆ng ôh, gru hmô lŏ kơrŭ wĭt klei đăo knang, klei gĭr ktưn leh anăn klei čang hmăng găn jih klei dleh dlan hlăm grăp čô đảng viên. Mơ̆ng dŭm bruă mă klă sĭt leh anăn jăk siam anăn, klei mĭn, knhuah mngač Hồ Chí Minh ngă leh, leh anăn dưi lar bra ktang, jing klei atăt gai hlăm bruă ngă, đru mkŏ mjing  Đảng ƀrư̆ doh mngač, kjăp ktang mơ̆ng nah gŭ./.