Jih jang 10 kdriêk, ƀuôn prŏng ti čar Kon Tum hrăm mbĭt mkŏ mjing knăm jap mă kahan aguah mbruê 13/2. Hlăm ênoh êbeh 980 čô hlăk ai êdah êdi mơ̆ng čar Kon Tum nao kahan mâo 800 nao ngă kahan hlăm dŭm anôk bruă lĭng kahan leh anăn êbeh 180 čô nao ngă bruă klam hlăm êpul kahan ksiêm.

Hlăm anăn, lĭng kahan mrâo jing mnuih djuê ƀiă mâo êbeh 80%. Ăt hlăm aguah mbruê, êbeh 2.800 čô lĭng kahan mrâo ti dŭm alŭ wăl mơ̆ng čar Gia Lai nao kahan, hlăm anăn 2.406 čô ngă bruă klam lĭng kahan leh anăn 469 čô ngă bruă klam kahan ksiêm. Phung kahan mrâo anei srăng ngă bruă ti dŭm anôk bruă mâo: Kahan alŭ wăl 5, Quân Đoàn 34, Knơ̆ng gĭt gai lĭng kahan knông lăn čar Gia Lai, knơ̆ng gĭt gai lĭng kahan čar Gia Lai, sư đoàn kahan êdeh phiơr 372, kahan ksiêm čar Gia Lai.

Mbĭt hŏng dŭm pluh êbâo čô kahan ti lu čar, hlăk ai hlăm kluôm ala, aguah mbrue, êbeh 3.000 čô hlăk ai čả Daklak nao mŭt kahan. Ti anôk jao kahan hlăm ƀuôn prŏng Ƀuôn Ama Thuôt 359 čô hlăk ai nao mŭt kahan. Phung čih hră akâo nao mŭt kahan gưl anei mâo, Y Đam Sam Niê ti ƀuôn hgŭm Ea Tam, ƀuôn prŏng Ƀuôn ama Thuột lač: “asei mlei kâo pô gĭr čiăng dưi găn jih klei dleh dlan hlăm anôk mjuăt hriăm lĭng kahan, mjuăt hriăm bi jăk pioh răng mgang lăn čar”.

Mbĭt hŏng ƀuôn prŏng Ƀuôn Ama thuôt, knăm jao mŭt kahan ăt mâo mkŏ mjing hlăm 14 boh kdriêk wăl krah čar Daklak. Kluôm čar mâo truh 3.036 čô hlăk ai nao mŭt kahan gưl anei, hlăm anăn mâo êbeh 160 čô hriăm jih gưl prŏng, gưl krah, gưl mkrah dưh, lu mnuih jing đảng viên.

Gưl anei, čar Dak Nông mâo 1.158 čô hlăk ai nao kahan. Hlăm anăn mâo giăm 5% phung leh hriăm gưl krah leh anăn gưl prŏng. Phung hlăk ai mơ̆ng čar Dak Nông nao kahan tal anei ti dŭm anôk bruă mâo Lữ đoàn 234 - Quân đoàn 34; Sư đoàn 2 – kahan alŭ wăl 5, Trung đoàn kahan jơ̆ng 994 –Knơ̆ng gĭt gai lĭng kahan čar Dak Nông, Knơ̆ng gĭt gai lĭng kahan knông lăn čar Dak Nông leh anăn kahan ksiêm čar Dak Nông.

Ăt hlăm aguah mbruê 13/2, êbeh 1.200 čô hlăk ai mơ̆ng čar Lâm Đồng nao kahan, hlăm anăn mâo 535 čô kahan mrâo jing mnuih djuê ƀiă. Hlăm ênoh anăn mâo 23 čô đảng viên. Phung hlăk ai anei ngă bruă klam ti dŭm anôk bruă hlăm Phŭn bruă lĭng kahan leh anăn kahan alŭ wăl 7