Êjai ngă bruă trŭn kơ klei kih mdoh bi kdơ̆ng hŏng phung nghă soh hlăm wưng Tết 2025, êpul bruă djŏ tuôm kdriêk Đức Cơ, čar Gia Lai hmao ƀuh leh klei, mă kơ̆ng 4 čô dŭ mdiăng truh 220kg phao mơar soh hŏng hdră bhiăn. Trung tá Nguyễn Lê Hồ Tân Ảnh, Khua êpul kahan ksiêm phung ngă soh, kahan ksiêm kdriêk Đức Cơ brei thâo:

“Lu phao mơar blei ba mơ̆ng Campuchia mŭt hlăm Việt Nam. Hŏng lu hdră lehanăn mnêč, phung tlĕ čhiư̆ mnia soh hŏng klei bhiăn jing hŏng hla pŏk yang ƀuôn, bi tuôm hŏng phung čiăng blei. Phung ghan mnia dŭm phao mơar hlăm kdô, amâodah dăp hlăm hlăm êdeh pui, êdeh dŭ mdiăng tue, mdăm hlăm êdeh snăn dŭ ba. Mâo lu klei mnuih ƀuôn sang bi hưn dưi mâo mă. Bi mguôp hŏng dŭm hŏng dŭm dhar bruă, êpul êya, kahan răng mgang knông lăn pai mă hlăm mta boh klei, pral thâo bĭt lehanăn tiŏ mă phung ngă soh”.

          Hlăm jih čar Gia Lai, dŭm êpul bruă djŏ tuôm hlăk mâo klei bi mguôp kjăp, kñăm rơ̆ng mâo klei êđăp ênang yang ƀuôn, gang mkhư̆ jih jang klei ngă soh hŏng klei bhiăn. Đại tá Nguyễn Văn Nghị, K’iăng khua bruă kđi čar knơ̆ng bruă kahan răng mgang knông lăn čar Gia Lai, brei thâo, kahan răng mgang knông lăn mbĭt hŏng kahan ksiêm kdriêk Đức Cơ, Čư̆ Prông, Ia Grai, mâo mă kơ̆ng leh êbeh 1.000kg phao mơar soh hŏng klei bhiăn.

  “Hlăm dŭm thŭn êgao, hlăm alŭ wăl knông lăn čar Gia Lai mâo nanao klei bi tlĕ čhĭ phao mơar soh hŏng klei bhiăn, hlăm dŭm mlan giăm tết, kahan răng mgang knông lăn čar Gia Lai mâo leh hdră gang mkhư̆, bi kdơ̆ng hŏng duĭm klei čhĭ mnia soh hŏng klei bhiăn. Wưng leh êgao, mâo mnuih ƀuôn sang đru, êpul kahan răng mgang knông lăn mâo mă kơ̆ng leh dŭm klei tlĕ čhĭ phao mơar.. Hmei gang mkhư̆ klei anei ti alŭ wăl knông lăn čar Gia Lai dưi mâo klei êđăp ênang.”./.