Leh hruê lăn čar hluh hlir, Lê Minh Đuông lŏ dơ̆ng duh myơr anăn jing sa čô knuă druh jih ai tiê mơ̆ng alŭ wăl hŏng lu bruă păn mdê mdê. Hlăm djăp bruă ngă, ñu gĭr amâo mâo mdei čiăng mđĭ hnơ̆ng klei hdĭp mnuih ƀuôn sang, ba ƀuôn sang Hồ Đắc Kiện mlih mrâo nanao. Sa hlăm dŭm gru kruăk mơ̆ng ñu hlăm wưng anei jing mtrŭt mđĭ bruă knơ̆ng kdơ̆ng êa čiăng mkra mđĭ krĭng lăn tlung, lăn msăm, mkŏ mjing klei găl kơ mnuih ƀuôn sang pla mdiê lŏ 2 wưng sa thŭn. Kyuanăn, hnư hrui wĭt mơ̆ng mnuih ƀuôn sang dưi bi hơĭt, krĭng ƀuôn sang mâo klei mlih, bruă lŏ hma ƀrư̆ ƀrư̆ jing klei găl mơ̆ng Hồ Đắc Kiện truh kơ ară anei. Lê Minh Đuông lŏ wĭt hdơr:

Hồ Đắc Kiện leh mtlaih êngêi jing krĭng lăn tlung, lăn dliê, mnuih ƀuôn sang pô hdĭp hŏng bruă mă kan hdang, ngă lŏ amâo mâo tŭ dưn, kyuanăn amâo mâo pô ngă ôh, kyua knŏng mâo mă 5 - 6 giạ/công. Kâo jing pô tal êlâo kơ klei mkra mlih lăn ti Hồ Đắc Kiện, msĕ si mkra knơ̆ng êa čiăng mđĭ wưng buh pla. Mơ̆ng thŭn 1976 truh kơ thŭn 1985, mmông anăn kâo ngă k’iăng leh anăn ngă khua bruă sang čư̆ êa să dưi mtrŭt mđĭ mkra mđĭ krĭng lăn anei, mtô kơ mnuih ƀuôn sang ngă bruă knuă, mkŏ wĭt bruă lŏ hma hluê hdră êlan mơ̆ng knŭk kna.

Thŭn 2012, Lê Minh Đuông wĭt mdei bruă, ƀiădah ai tiê “Lĭng kahan Awa Hồ” hlăm ñu ka tuôm luč ôh. Amâo mâo mdei ôh, Lê Minh Đuôn wăt hlăm pô mâo klei ruă êka, boh nik hlăm mmông adiê êăt, ƀiădah ñu ăt truăn nanao hŏng bruă mơ̆ng ƀuôn hgŭm, mơ̆ng să. Čiăng bi lar krĭng lăn mâo klei găl kơ bruă lŏ hma, boh nik jing mdiê lŏ, ñu lŏ mtrŭt mjhar mnuih ƀuôn sang pla mdiê sa bĭt,  mkra mjing mdiê hŏng bruă mkŏ mjing dŭm êpul hgŭm bruă lŏ hma. Mơ̆ng klei bi hmô êpul hgŭm bruă anei, mnuih ƀuôn sang thâo dưn yua hdră mnêč mrâo mrang, yua mjeh jăk, hbâo pruê, boh nik dưi ba čhĭ mnơ̆ng dhơ̆ng, mdiê mâo boh, ênoh hơĭt, prăk mnga đĭ lu. Lê Minh Đuông lŏ brei thâo:

Ară anei mdiê mâo lu leh, 6-8 tôn hlăm sa ha, boh nik klei thâo ngă bruă lŏ hma mơ̆ng mnuih ƀuôn sang ară anei đĭ leh, mâo klei hriăm, kyuanăn mâo mdiê lu. Bi hŏng klei kreh knhâo mrâo mrang ƀĭng ngă lŏ hma jhŏng dưn yua, ară anei dưi lač mâo êbeh 80% ƀĭng ngă lŏ hma thâo kơ bruă ngă lŏ.

Klei năng mpŭ hĭn mơ̆ng kahan êka Lê Minh Đuông anăn jing wăt kơ ñu 70 thŭn leh, grăp hruê ăt nao mbĭt hŏng mnuih ƀuôn sang čuă lŏ, bi trông kơ klei hriăm mkra mjing, mtô kơ phung mda asei. Ñu jing pô nao êlao hlăm bruă dưn yua klei mrâo mrang hlăm bruă pla mjing, boh nik jih jang bruă mkra mjing mdiê dưi yua masin, kyuanăn grăp wưng mâo mdiê lu, mâo prăk mnga.

Amâo djŏ knŏng jing lĭng kahan siă suôr, ñu lŏ jing knuă druh bi hmô, ƀĭng ngă lŏ hma thâo leh anăn jing gru mngač kơ phung mda asei. Dŭm mta bruă ñu ngă dưi bi klă kơ ai tiê “Kahan êka ƀiădah ăt thâo mbruă”, leh anăn lŏ jing klei yăl dliê siam kơ ai hdĭp, klei khăp kơ lăn čar leh anăn klei duh myơr amâo mâo mdei kơ lăn čar, ƀuôn sang. Hŏng dŭm klei duh myơr anăn, ñu mâo Đảng leh anăn knŭk kna mđup brei mêdah mblah Mi mrô 2, Mêđai răng mgang lăn čar, mêđai 50 thŭn Đảng, mbĭt hŏng lu hră pah mni mkăn… Nguyễn Văn Mỹ, khua bruă sang čư̆ êa ƀuôn hgŭm Hồ Đắc Kiện, ƀuôn prŏng Cần Thơ brei thâo:

Êpul lĭng kahan hđăp jing sa hlăm dŭm dhar bruă, êpul bruă bi hmô, lu ƀĭng hgŭm mđĭ hĭn bruă mkra mjing čiăng čŏng pô mđĭ kyar klei hdĭp mda gŏ sang, hlăm anăn mâo lu lĭng kahan hđăp jing phung thâo mkra mjing, nao êlâo hlăm klei mđĭ kyar bruă duh mkra, msĕ si ngă mdiê lŏ čŏng pô mđĭ klei hriăm, mđĭ klei thâo, dưn yua klei mrâo mrang čiăng bi hrŏ ênoh bi liê, mđĭ hnư hrui wĭt, mơ̆ng anăn jing gru mngač čiăng kơ mnuih ƀuôn sang hriăm leh anăn hluê ngă.

Hŏng ai tiê “Lĭng kahan Awa Hồ”, phung kahan êa thâo mbruă jing phung thâo mkra mjing, lĭng kahan hđăp, kahan êka Lê Minh Đuông lŏ jing pô bi klă kơ ai tiê găn klei dleh dlan, klei khăp kơ lăn čar leh anăn klei hmăng hmưi duh myơr.