Grăp hruê, hlăk yan hruê ka ƀlĕ ƀiădah êpul Kahan ksiêm êa ksĭ Việt Nam mprăp leh djăp ênŭm. Ală dlăng mngač, grăp knhuang kjăp mơ̆ng phung kahan msĕ si dưi hŏng klei hlơr yan mđiă kwar Dưr. Adiê mđiă êbeh 40 độ C amâodah dŭm gưl adiê hjan sui dŭm mmông ƀiădah phung kahan ăt kjăp, aguah hriăm - tlam hriăm, lu hruê mđĭ mmông hriăm wăt mmăt.

Thượng úy Nguyễn Hữu Duy Thái brei thâo: Čiăng dưi mâo êpul kjăp, grăp čô hlăm êpul brei gĭr jih ai tiê. Grăp knhuang, klei blŭ brei ngă bi jăk, bi raih. Wăt tơdah dleh dlan, ƀiădah grăp čô gĭr bi êdah djŏ ai êwa phung Kahan ksiêm êa ksĭ Việt Nam.

“Dưi hơô hĕ kdrăp Kahan ksiêm êa ksĭsnăn kâo pô hŏng jih jang phung hlăm êpul ktưn hưn sơăi tơdah srăng dưi êbat hlăm wăl tač Ba Đình hƀuê ênuk. Hdră hriăm hlăm yan adiê amâo găl jăk ƀiădah hmei ăt gĭr jih ai tiê čiăng bi leh jăk bruă klam:

Dôk ti krah êpul kahan, Trung úy Trần Đức Nhân mgei ai tiê: Anei jing klei ktưn hưn prŏng prĭn hŏng drei pô. Dưi mguôp hlăm êpul ep ruĕ kahan hlăm knăm mơak prŏng, dlăng anăn jing klei ktưn hưn, ăt jing bruă klam. Ai tiê bi hgŭm leh anăn klei mĭn gĭr ktưn đru phung knuă druh lĭng kahan găn jih klei dleh dlan, suăi êmăn.

“Brei dưi hŏng ai tiê pô čiăng găn klei dleh dlan. Drei pô brei gĭr ktưn leh anăn brei mâo klei mĭn gih ai tiê prŏng hĭn. Klei ktưn hưn jing drei pô đru mguôp leh 1 kdrêč điêt hlăm bruă klam prŏng mơ̆ng lăn čar”.

Bi Thượng úy Nguyễn Phúc Đệ, leh sut drah hjan lĕ ti ƀô̆ mta jiă mđiă brei thâo dŭm êpul bi leh wưng mtô mjuăt bi hriăm klă klơ̆ng, ară anei dôk mŭt hlăm wưng  mjuăt êlam hĭn, hriăm hŏng dŭm êpul. Mâo suăi êmăn, ƀiădah êlâo hĭn jing klei ktưn hưn tơdah hơô kdrăp kahan ksiêm êa ksĭ, mâo klei đru mguôp sa kdrêč điêt hlăm knăm mơak prŏng djuê ana.

Kâo pô myun snăk leh anăn mơak tơdah mâo đru mguôp hlăm klei tŭ jing hlăm knăm mơak prŏng. Kâo leh anăn phung găp hlăm êpul jih ai tiê čiăng bi leh jăk bruă klam êdah kdưn.

Leh mmông hriăm mjuăt, Trung tướng Lê Quang Đạo – Khua Kahan ksiêm êa ksĭ leh anăn Trung tướng Bùi Quốc Oai – Khua dlăng bruă  Đảng Kahan ksiêm êa ksĭ – nao ti tač mjuăt, nao hlăm djăp êpul čiăng êmuh hrăm mđĭ ai. Dŭm klei mă kngan kjăp, klei mtă mtăn bŏ hŏng đăo knang, hŏng dŭm mnơ̆ng jăk thiăm ai ktang kơ phung knuă druh, lĭng kahan. Bi ala kơ Khua Anôk bruă Kahan ksiêm êa ksĭ Việt Nam, Trung tướng Bùi Quốc Oai mtă mtăn:

“Brei jih jang thâo răng kriê klei suaih pral, mđĭ lar hnơ̆ng hriăm mjuăt, ba hlăm pô klei ktưn hưn leh anăn klei mơak. Hlăm knăm mơak prŏng, grăp knhuang êbat diih srăng amâo djŏ knŏng bi êdah ai ktang leh anăn klei knhăk ôh, ƀiădah lŏ jing rup klei hriê kơ prŏng đĭ kyar mơ̆ng Kahan ksiêm êa ksĭ Việt Nam.”

Mđĭ lar ai tiê krŭ kdơ̆ng mlan 8 leh anăn hruê mkŏ mjing ala čar 2-9 kdrưh kơăm, hŏng knhuah gru gĭr tŭ dưn mơ̆ng Êpul lĭng kahan yang ƀuôn Việt Nam, klei gĭr bi hgŭm, gĭr amâo mdei mơ̆ng phung knuă druh lĭng kahan, Knăm ep ruĕ kahan ti Wăl tač Ba Đình hruê 2/9 kơ anăp, dŭm knhuang êbat ktang, mđrăm mbĭt mơ̆ng êpul Kahan ksiêm êa ksĭ klă sĭt srăng jing rup siam, ba  klei bi hdơr jăk siam hlăm ai tiê mnuih ƀuôn sang hlăm ala čar leh anăn ala tač êngao.