Nao mbĭt hŏng hluê ngă hdră êlan bi mlih mrâo, Khánh Hoà dôk bi mlih mrâo dŭm boh kdrŭt đĭ kyar hlăm mđĭ kyar bruă mkŏ mkra bruă tuh tia leh anăn pui kmlă. Čar kñăm iêo jăl dŭm hdră anôk bruă duh mkra wăl mnơ̆ng hdĭp, bruă th tia kdrăp mrâo mrang, nao mbĭt hŏng bi hrŏ mmông mkăp brei klei dưi leh anăn mđĭ hnơ̆ng đru kơ phung duh bi liê. Ti krah mlan 12 mrâo êgao, Bruă sang čư̆ êa čar Khánh Hoà tŭ ư hdră êlan duh bi liê leh anăn phung duh bi liê hdră rŭ mjing, mnia mblei anôk bruă duh mkra Ninh Diêm 1, hlăm anôk bruă duh mkra Vân Phong.

Jih jang hdră mtrŭt mđĭ truh kơ mkăp brei hră tŭ yap duh bi liê knŏng ngă hlăm dŭm mlam. Trần Minh Chiến, khua êpul kiă kriê anôk bruă duh mkra leh anăn wăl anôk tuh tia čar Khánh Hoà brei thâo:

“Hmei ba yua jih jang dŭm hdră mtrŭn mơ̆ng knŭk kna kơ hdră êlan mđĭ kyar. Hluê anăn dưi mkra mlih ênoh čuăn lăn anôk bruă tuh tia, mkra mlih čuăl mkă tŭ ư hdră êlan duh bi liê, tŭ ư phung duh bi liê. Klei hriăm đa đa bruă mdua, dôk ngă bruă anei ăt mprăp kơ bruă mkăn, leh mâo djăp klei găl srăng ba mdah hră mơar mtam. Sơnăn kơh dưi ngă pral”.

Ngă klei mlih mrâo bruă knŭk kna ti Khánh Hoà dưi pral bi lar hlăm bruă mkra mjing – mnia mblei. Knơ̆ng bruă duh mkra mnia mblei Miboo Vina, knơ̆ng bruă mkra mjing kŭm păn 100% ngăn prăk mơ̆ng tac êngao, jing klei bi klă. Hdră mkra sang măi đru kơ bruă mkra kŭm păn ti wăl anôk bruă tuh tia Ninh Thủy mâo hnơ̆ng êbeh 12 ha, ênoh duh bi liê 20 êklăk USD, jih jang hdră duh bi liê dưi ngă khuăt, pral êbeh 70% mkă hŏng klei čuăn. Nguyễn Văn Trãi, khua kiă kriê sang măi brei thâo:

“Kâo thâo čiăng dưi mâo hră tŭ yap duh bi liê kreh luč mơ̆ng 2 – 3 mlan. Êpul ngă bruă mtô jăk êdi, ka bŏ sa hruê kăm mâo leh hră tŭ yap kơ hmei. Mơ̆ng knơ̆ng bruă knŏng mkra mjing kdrăp yua, hmei dưi truh mkra mjing jih jang kơ hmôk, asei kŭm păn”.

Klei kpĭ đĭ kyar hlăm dŭm thŭn kơ anăp ktang hĭn êjai, bruă čar Khánh Hoà nao hŏng 3 klei kdlưn hĭn mơ̆ng gưl dlông jing leh kmeh gơ̆ng. Hŏng êlan nao anei, dŭm hdră pui kmlă doh ti Khánh Hoà dưi ngă pral, knŏng hlăm 6 man dưi mkŏ hŏng pui kmlă ala čar. Nguyễn Văn Nhựt, Khua knơ̆ng bruă tuh tia čar Khánh Hoà brei thâo, čar mrâo ba yua sang măi pui kmlă pil yang hruê Phước Thái 2, mĭn tĭng akŏ thŭn 2026 lŏ dơ̆ng ba yua sang măi pui kmlă pil yang hruê Phước Thái 3, lŏ mkŏ mjing boh kdrŭt đĭ kyar hlăm wưng kơ anăp:

 “Amâo lŏ mâo êlan mkăn ôh, čiăng đĭ kyar ti anăo dŭm boh kdrŭt mrâo, ai dưi mrâo čar Khánh Hoà ka mâo ôh. Sitôhmô bruă tuh tia dưi bi klă jing kmeh gơ̆ng mrô sa ƀiădah bruă tuh tia čiăng mâo mmông čiăng kơ dŭm hdră êlan mrâo, boh kdrŭt nao ngă bruă. Kyuanăn, knŏng adôk pui kmlă yơh jing phŭn”.

Hluê si dŭm klei kdlưn hĭn, gru hmô mkra mjing mrâo leh anăn pui kmlă, Khua bruă Đảng čar Khánh Hoà Nghiêm Xuân Thành mñă ktang brei ngă hrăm mbĭt dŭm hdră êlan bi hluh klei kpăk, iêo jak tŭ dưn dŭm ai dưi, lŏ dơ̆ng mlih mrâo bruă knŭk kna, mđĭ hnơ̆ng jăk đru kơ mnuih ƀuôn sang, knơ̆ng bruă:

 “Ngă sơnăn kơh dưi ƀuh lu boh klei, bruă ngă klă klơ̆ng. Êjai dưi mâo 10 bruă klam phŭn, 3 bruă klam kdlưn hĭn jing mta kñăm, mta phŭn, mâo knhuah bi mlih boh klei. Hluê si dŭm hdră êlan mơ̆ng gưl dlông msĕ si mđĭ kyar klei kreh knhâo mrâo mrang… Hdră êlan, hdră mtrŭn mơ̆ng bruă Đảng čar, jih jang dŭm klei anei čiăng mâo pô ngă. Anôk bruă djŏ tuôm ya bruă pô srăng ngă bruă anăn, sơnăn kơh dưi bi leh hdră mtrŭn. Leh anăn bruă anei srăng mâo gưl bruă nah dlông bi klă, ksiêm dlăng./.