Klei bi blah ti krĭng Msăt boh lăn srăng ngă kơ ênoh čhĭ êa pui lehanăn klei bi liê kơ logistics đĭ hĭn, srăng ktŭng ba klei bi liê hlăm bruă duyh mkra mơ̆ng dŭm anôk duh mkra đĭ mơh. Anăp ngă dleh kpăk kơ dŭm bruă dŭ mdiăng êlan êa ksĭ hŏng ala tač êngao, lehanăn srăng hmăi amâo mâo jăk hlăm klei bi mnia mblei hŏng ala tač êngao, hmăi truh kơ dŭm bruă duh mkra phhŭn ti čar Khánh Hòa msĕ si bruă pơ̆ng mkra hô̆ pui, mkra mjing kan hdang, lehanăn bruă hiu čhơưn ênguê – bruă mnia mblei. Ti anăp klei bi mlih mơ̆ng klei bi mni amblei dlông rŏng lăn anei, lu phung duh mkra hlăm čar hlăk duah djăp hdră mdrơ̆ng bi djŏ hŏng klei dôk găn, duah lu anôk hlăm klei bi mnia mblei, lehanăn klei tŭ dưn mnơ̆ng pô mkra mjing. Trịnh Thị Hồng Vân, Khua knơ̆ng bruă Yến sào Khánh Hòa brei thâo hlăk dôk mđĭ ênoh bi liê kơ klei dôk krah wah, pŏk bruă bi mnia mblei hlăm ala čar lu hĭn, lehanăn tui duah dŭm anôk mnia mblei prŏng.

“Êngao kơ bruă čhĭ hruh čĭm iăt kơ ala tač êngao, hmei lŏ dơ̆ng mđĭ hĭng bruă pô mkra mjing, mơ̆ng anăn mđĭ boh tŭ dưn kơ čar, kơ phung duh mkra. Hmei srăng hgŭm kjăp hŏng dŭm êpul grŭp prŏng tĭng kơ China pioh mđĭ kyar.”

Tui si Nguyễn Sanh Đương, k’iăng khua knơ̆ng bruă duh mkra mnia mblei  Khánh Hòa, klei bi blah ti krĭng Msăt boh lăn hlăk hmăi amâo mâo jăk truh hŏng bruă duh mkra mnia mblei mơ̆ng lu phung duh mkra hlăm čar. Ară anei klei bi mnia mblei mơ̆ng Khánh Hòa truh hŏng alŭ wăl anei mâo hlăm brô 210 êklăk USD, truh giăm 10% ênoh jih jang bruă bi mnia mblei hŏng ala tač êngao, êjai anăn blei mnơ̆ng mơ̆ng ala tač êngao hlăm brô 10 êklăk USD. Ênoh čhĭ êa pui đĭ ngă kơ dŭm bruă pơ̆ng mkra hô̆ pui, bruă mkra mjing hdang kan, bruă hiu čhưn ênguê lehanăn mnia mblei tŭ lu klei ktrŏ hlăm klei duh mnkra lehanăn prăk dŭ mdiăng. Ti anăp klei anei, bruă duh mkra mnia mblei hlăk hgŭm hŏng dŭm knơ̆ng dhar bruă anôk kiă kriê klei duh mkra čar Khánh Hòa đru phung duh mkra ruh mgaih klei dleh dlan, mtrŭt bruă duh mkra đĭ kyar. Nguyễn Sanh Đương brei thâo:

“Čiăng bi hnô, dhar bruă mđing đru phung duh bi liê. Boh nik hŏng 2 bruă bi êran pui kmlă hŏng pil yang hrue Phước Thái 2, Phước Thái 3, gĭr bi êran hlăm mlan 3, dưn yua jih pui kmlă dưi mâo. Mbĭt anăn hgŭm hŏng dŭm knơ̆ng dhar bruă đru kơ phung duh mkra, mghaih msir klei dleh dlan, mđĭ bi kjăp klei mă bruă.”

  Dŭm klei bi mlih bruă duh mkra dlông rŏng lăn, brei ƀuh klei yuôm bhăn mơ̆ng bruă mđĭ kyar klei duh mkra mơ̆ng êa ksĭ lehanăn jih jang bruă logistics ară anei. Hŏng klei găl kdrŭn êa ksĭ êlam, boh nik ti Vân Phong, Khánh Hòa hlăk lŏ dơ̆ng bi kjăp jing anôk jưh jơ̆ng bruă êlan êa, lehanăn logistics mơ̆ng alŭ wăl dhŭng kwar krah. Kơ bruă mkăp mnơ̆ng mnuă hŏng tar rŏng lăn, klei duh bi liê mkra mđĭ kdrŭn ksĭ, alŭ wăl duh mkra lehanăn jih jang bruă logistics srăng đru kơ alŭ wăl mđĭ hĭn klei dưi mdrơ̆ng hŏng djăp mta klei amâo mâo jăk mơ̆ng nah êngao. Nguyễn Thanh Hà, K'iăng khua knơ̆ng bruă sang čư̆ êa čar Khánh Hòa brei thâo čiăng dưi krơ̆ng hnơ̆ng đĭ kyar dua mrô, čar hlăk lŏ ksiêm wĭt ênoh čuăn, ruh mgaih jih klei dleh dlan kơ phung duh mkra, mđĭ hĭn hlăm dŭm bruă knơ̆ng.

“Mta kñăm phŭn klei đĭ kyar thŭn 2026 jing klei duh bi liê kluôm. Hmei dôk tui ksiêm, mbha ngăn prăk duh bi liê mtam kơ hdră êlan kluôm mơ̆ng akŏ thŭn. Anei jing bruă yuôm bhăn snăk, bi mklă kơ mta kñăm mđĭ kyar bi mâo dua mrô mơ̆ng Khánh Hòa hlăm thŭn anei. Ară anei adôk êbeh 4.000 êklai prăk pioh bi mbha klă mngač kơ klei duh bi liê.”

Hlăm 2 mlan akŏ thŭn 2026, čar Khánh Hòa ăt dôk krơ̆ng hnơ̆ng đĭ kyar jăk. Mâo ba wĭt ngăn prăk kơ knŭk kna êbeh 11.600 êklai prăk, jing knar 30% ênoh tĭng mkă mơ̆ng gưl dlông jao, lehanăn đĭ 1,7 mkă hŏng wưng anei thŭn dih. Êjai klei duh mkra dlông rŏng lăn dôk găn lu klei amâo mâo hơĭt. Klei čŏng kiă kriê, bi lar lu hdră mă bruă mđĭ hĭn klei tŭ dưn bruă duh mkra êa ksĭ jing hdră čiăng kơ Khánh Hòa dưi krơ̆ng kjăp klei mđĭ kyar, mjing atur bi leh mta kñăm klei đĭ kyar kjăp hlăm thŭn 2026 lehanăn dŭm thŭn tianăp./.