Klei ruah khua phung bi ala bruă kƀĭn ala gưl  16 lehanăn Êpul gơ̆ng bruă ƀuôn sang dŭm gưl wưng thŭn 2026–2031 ti čar Daklak djŏ hdră êlan êđăp ênang, lehanăn djŏ hŏng klei čoh čuăn mơ̆ng hdră bhiăn.

Tui si klei hâo mdah mơ̆gn dhar bruă kiă kriê klei ruah khua car Daklak, kluôm čar mâo giăm 2,3 êklăk čô mnuih nao ruah khua. Yap truh 7h tlam  hrue 15/3, thnơ̆ng ênoh mnuih nao ruah mâo êbeh 99,9%. Năng mđing êdi, lu ƀuôn hgŭm bi leh ênŭm  100% ênoh mnuih nao mplĕ hră. Boh tŭ dưn anei brei ƀuh bruă klam, klei sa ai lehanăn klei thâo săng hlăm bruă kđĭ čar jing prŏng mơ̆ng mnuih ƀuôn sang hlăm kluôm ala.

Tui si anôk bruă kiă kriê klei ruah khua čar Daklak, khădah ênoh mnuih nao ruah jing lu, dŭm alŭ wăl hlăm čar ăt dôk mâo dŭm bruă mă ka klă, amâo mâo kjăp bruă răng gmang klei êđăp ênang. Êpul kahan ksiêm, lĭng kahan, lehanăn dŭm êpul bruă djŏ tuôm năng mđĭ hĭn klei hiu gak, păn kjăp boh klei hlăm alŭ wăl, mprăp mghaih msir bi pral jih jang klei amâo mâo jăk, rơ̆ng kjăp kơ klei ruah khua êđăp ênang sĭt.

Cao Thị Hòa An, Khua êpul gơ̆ng bruă ƀuôn sang čar brei thâo, truh ti wưng anei, klei ruah khua mâo leh klei tŭ jing jăk siam:

“Truh ti wưng anei, ai êwa klei ruah khua phung bi al abruă kƀĭn ala lehanăn Êpul gơ̆ng bruă ƀuôn sang dŭm gưl mâo mkŏ mjing hŏng klei tŭ jing jăk siam, klă sĭt jing hrue mơak kơ jih jang mnuih. Klei anăn mâo bi êdah hlăm klei mnuih ƀuôn sang sa ai bi nao ruah khua, jing klei mơak êjai djă ti kngan pô hră mplĕ čiăgn ruah mnuih pô đăo knang bi ala brei kơ pô mgi dih. Jih jang klei anăn yơh mâo bi êdah kơ ai tiê mnuih ƀuôn sang hŏng Đảng, hŏng bruă sang čư̆ êa, lehanăn jih jang bruă kđi čar. Mnuih ƀuôn sang mâo bruă klam prŏng, dŭm klei mơĭt ai tiê klei mĭn, klei čang hmăng anăn hŏgn pô bi ala brei kơ pô.”