Hlăm ênoh giăm 2,6 êklăk čô mnuih kluôm čar Lâm Đồng mâo 99,66% ênoh mnuih nao mplĕ hră. Hlăm anăn mâo 59/124 gưl să; 1.951/ 2.296 krĭng mplĕ hră mâo 100% ênoh mnuih nao mplĕ hră.

Hluê si klei tĭng dlăng mơ̆ng Dhar bruă ruah khua čar Lâm Đồng, mnuih ƀuôn sang kluôm čar mđing truh kơ hruê ruah khua, bi êdah klei sa ai, đăo knang hlăm klei ruah khua. Mnuih ƀuôn sang mđing tui ksiêm kơ klei hdĭp, bruă mă mơ̆ng phung mgơ̆ng ruah êlâo kơ mplĕ hră. Mnuih buôn sang bi êdah leh ai tiê đua klam, hgŭm mguôp, đăo knang hlăm klei tŭ jing mơ̆ng hdră ruah khua./.

 Čar Gia Lai đã mâo 99,76% mnuih ƀuôn sang nao ruah khua phung bi ala bruă kƀĭn ala gưl 16 lehanăn phung bi ala Êpul gơ̆ng bruă ƀuôn sang dŭm gưl wưng thŭn 2026 – 2031. Čar Gia Lai mâo hnơ̆ng ênoh nao ruah khua jing lu. Hlăm giăm 2,6 êklăk čô mnuih mâo čih yap, snăn 99,76% čô mnuih nao mplĕ hră. Năng mđing êdi, 96/135 boh ƀuôn hgŭm mâo ênoh mnuih nao ruah ênŭm 100%. Boh tŭ dưn anei brei ƀuh bruă đua klam , lehanăn klei sa ai prŏng mơ̆ng mnuih ƀuôn sang hlăm bruă prŏng  mơ̆ng lăn čar, klei anăn bi êdah klei mprăp leh ƀhĭ ênŭm mơ̆gn dŭm alŭ wăl. Mnuih ƀuôn sang bi myuôm bruă prăp êmiêt, klei mkŏ mjing mơ̆gn dŭm gưl hlăm klei ruah khua dŭm gưl dhar bruă čar Gia Lai. Lehanăn čang hmăng phung bi ala leh djŏ ruah thâo mđing hmư̆ lehanăn ngă bruă kyua klei mđĭ kyar alŭ wăl lehanăn lăn čar./.

Anôk gĭt gai hdră ruah khua čar Khánh Hòa brei thâo, hdră ruah phung bi ala bruă kƀĭn ala gưl XVI lehanăn Êpul gơ̆ng bruă ƀuôn sang dŭm gưl wưng thŭn 2026-2031 ti alŭ wăl čar mkŏ mjing tŭ dưn, truh 5h tlam, ênoh mnuih nao ruah mâo giăm 99%, 47/65 să, ƀuôn hgŭm mâo ênoh mnuih nao ruah 100%.

Nghiêm Xuân Thành, Khua bruă Đảng, Khua anôk gĭt gai hdră ruah khua čar Khánh Hòa mtă kơ dŭm êpul ksiêm dlăng hră mplĕ hluê ngă kjăp hdră ksiêm dlăng, mđĭ hdră tui ksiêm, amâo lui bluh mâo klei kčŭt hưn. Dŭm anôk thơ̆ng kơ bruă djŏ tuôm brei pral bi leh hră mơar čiăng pral hưn mthâo boh tŭ hdră ruah khua mơ̆ng alŭ wăl kơ Êpul hgŭm ruah khua ala čar lehanăn hưn mthâo boh tŭ hluê djŏ wưng kčah mtrŭn./.