Hlăm wưng ênoh dŭ mdiăng leh anăn ênoh mnơ̆ng yua đĭ yuôm, knơ̆ng bruă Yến sào Khánh Hòa ăt rơ̆ng kơ klei đĭ kyar jăk. Wưng tlâo mlan tal 1/2026, hnư hrui wĭt mơ̆ng knơ̆ng bruă mâo hlăm brô 1.040 êklai prăk, đĭ 19% mkă hŏng wưng anei thŭn duh, bi leh êbeh 30% hdră kčah hnư hrui wĭt hlăm thŭn. Hluê si Trịnh Thị Hồng Vân, khua êpul gơ̆ng knơ̆ng bruă Yến sào Khánh Hòa, knơ̆ng bruă mtrŭt mđĭ klei mnia mblei, pŏk mlar anôk ba čhĭ, boh nik jing ti China. Mbĭt anăn, knơ̆ng bruă hluê ngă lu hdră êlan bi hrŏ ênoh bi liê čiăng krơ̆ng kơ ênoh čhĭ, rơ̆ng kơ ai bi ktưn mơ̆ng mnơ̆ng dhơ̆ng.

Dŭm anôk mnia mblei dleh msĕ si Mi, Australia, Canada mâo ênoh čuăn lu, ƀiădah klei čuăn tui duah phŭn agha mơ̆ng China jing kjăp hĭn, mơ̆ng klei hrui mă, mkra mjing truh kơ ba čhĭ leh anăn mkăp brei. Kyuanăn, knơ̆ng bruă dôkbi mguôp hŏng phung ƀĭng hgŭm leh anăn êpul grŭp prŏng ti China čiăng pŏk mlar anôk ba čhĭ leh anăn mđĭ kyar anăn knăl Yến sào Khánh Hòa”.

Nao mbĭt hŏng klei gĭr mơ̆ng knơ̆ng bruă, hdră mtrŭt mđĭ klei bi liê thŭn 2026 mơ̆ng čar Khánh Hoà ăt knăm iêo jak ai dưi lu ala čar hlăm dŭm mta bruă phŭn msĕ si bruă tuh tia, pui kmlă, hiu čhưn ênguê leh anăn wăl krah – mkŏ mkra. Mta kñăm thŭn anei jing iêo jak ƀiă êdi 2 hdră FDI mâo ênoh bi liê mơ̆ng 100 êklăk USD kơ dlông. Trần Minh Chiến,  khua êpul kriê dlăng anôk bruă duh mkra leh anăn dŭm anôk bruă tuh tia čar Khánh Hoà brei thâo, bruă mtrŭt mđĭ klei duh bi liê mâo anôk bruă bi klă phung ƀĭng hgŭ klă klơ̆ng, mkŏ hŏng dŭm anôk ƀruă hŏng tač êngao leh anăn êpul bruă ala tač êngao čiăng hưn mdah klei găl duh bi liê ti alŭ wăl.

Êjai phung duh bi liê ala tač êngao mâo klei čiăng ksiêm duah, yăng đar diñu srăng êmuh anôk bruă bi ala ala čar pô êlâo. Kyuanăn, tơdah drei mkăp brei ênŭm klei hưn kơ phung bi ala srăng găl êdi. Hŏng klei mjĕ giăm anei, phung bi ala dưi hưn mdah leh anăn đru mkŏ phung duh bi liê. Hmei srăng iêo jak phung duh bi liê pô čiăng duh bi liê, iêo jak diñu nao čuă dlăng, ksiêm dlăng, bi klă”.

Êngao kơ iêo jak duh bi liê, Khánh Hòa dôk mtrŭt mđĭ klei mnia mblei, đru kơ knơ̆ng bruă  pŏk mlar klei ba čhĭ. Sa êlan nao mrâo jing ba yua anôk mnia mblei Halal, anô mâo êbeh 2 êklai čô blei ba yua dlông rŏng lăn. Dŭm knơ̆ng bruă alŭ wăl dôk đru bi leh hră tŭ yap Halal, mđĭ hnơ̆ng jăk mnơ̆ng dhơ̆ng leh anăn pŏk mlar klei ba čhĭ dŭm mta mnơ̆ng găl.

Hlăm bruă hiu čhưn ênguê, Khánh Hòa lŏ dơ̆ng mtrŭt mđĭ ti dŭm anôk phŭn msĕ si Dhŭng Korea, India leh anăn Russia, mbĭt anăn mkŏ mjing dŭm êpul famtrip mơ̆ng knơ̆ng bruă hiu atăt tuê hriê ksiêm dlăng anôk truh leh anăn mnơ̆ng dhơ̆ng hiu čhưn ênguê. Hluê Trương Văn Tiến,  khua knơ̆ng bruă mtrŭt mđĭ duh bi liê mnia mblei leh anăn hiu čhưn ênguê čar Khánh Hoà, dŭm mta bruă mtrŭt mđĭ srăng đru pŏk mlar anôk mnia mblei, mtrŭt mđĭ klei blei ba yua leh anăn ba čhĭ tinăn mtam hŏng bruă hiu čhưn ênguê.

Hlăm wưng ară anei, hmei mtrŭt mđĭ klei ba čhĭ hlăm lăn čar, mbĭt anăn lŏ dơ̆ng pŏk mlar dŭm anôk mnia mblei čar siñê bi mguop, boh nik hlă dŭm anôk ƀiă klei hmăi mơ̆ng nah êngao. Hŏng dŭm mta bruă mtrŭt mđĭ klei mkŏ, hiu čhưn ênguê ăt srăng đru mtrŭt mđĭ klei blei ba yua leh anăn ba čhĭ tinăn mtam”.

Hluê si Nguyễn Việt Hùng, Khua Bruă sang čư̆ êa čar Khánh Hòa bruă mtrŭt mđĭ klei duh bi liê mơ̆ng čar dôk bi mlih mơ̆ng klei čang guôn jing čŏng pô tui duah phung duh bi liê, hluê si klei găl bruă duh mkra êa ksĭ, kdrŭn ksĭ leh anăn logistics:

“Khánh Hòa mâo lu klei găl, boh nik jing kdrŭn ksĭ leh anăn logistics. Hlăm wưng kơ anăp, mkŏ mjing hdră êlan iêo jak phung duh bi liê mâo kơhưm. Êjai phung duh bi liê prŏng hlăm alŭ wăl, wăl anôk knơ̆ng bruă diñu srăng mkŏ mjing, đru bi mbŏ dŭm wăl anôk bruă tuh tia mkra mjing”.

Hŏng hdră tă mtrŭt mđĭ bruă hŏng tač êngao đru mđĭ kyar hluê ai tiê Hdră mtrŭn mrô 59 – mơ̆ng Phŭn bruă kđi čar, mbĭt hŏng hdră ngă bruă čŏng pô leh anăn jăk hlăm mtrŭt mđĭ klei bi liê, mnia mblei leh anăn hiu čhưn ênguê, Khánh Hòa dôk pŏk mlar anôk ba čhĭ, iêo jak ai dưi ala tač êngao, mkŏ mjing tur knơ̆ng čiăng kơ alŭ wăl mđĭ kyar ktang bruă duh mkra êa ksĭ leh anăn bruă mkăn ti alŭ wăl Dhŭng kwar krah.