Ti Sang hlang Nà Nưa, Khua Anôk bruă kƀĭn ala Trần Thanh Mẫn lehanăn Êpul mă bruă lui leh sa mnĭt lŏ bi hdơr kơ Khua gĭt gai Hồ Chí Minh; bi êdah klei lač jăk prŏng prĭn kơ klei đru mguôp yuôm bhăn mơ̆ng Ñu, sa čô Khua gĭt gai knhâo, jih klei hdĭp duh myơr kơ klei êđăp ênang, hnŭk êngiê, hluh lir djuê ana, kơ klei yâo mơak kơ mnuih ƀuôn sang.

Leh kơnăn, Khua Anôk bruă kƀĭn ala Trần Thanh Mẫn nao čuh leh brui mngưi lehanăn nao pla ana kyâo bi hdơr ti Sang yang Tân Trào, anôk mkŏ mjing Klei bi kƀĭn ala čar hlăm hruê 16-17/8/1945, bi mklă Hdră kdơ̆ng mblah kluôm sua wĭt klei êngiê hlăm kluôm ala čar. Khua Anôk bruă kƀĭn ala Trần Thanh Mẫn ƀuăn mbĭt hŏng kluôm Đảng, lĭng kahan lehanăn jih jang mnuih ƀuôn sang gĭr pŏk ngă tŭ dưn dŭm hdră êlan mtrŭn, hdră msir mơ̆ng bruă Đảng gưl dlông, Anôk bruă kƀĭn ala, Knŭk kna čiăng ba ala čar drei mŭt hlăm wưng mrâo, ênuk kpưn đĭ kyar sah mdrŏng mơ̆ng djuê ana./.