Aguah mbruê 13/2, brei klei blŭ mguôp hlăm êpul kơ hdră bhiăn mkŏ mjing knŭk kna ( mkra mlih), Khua bruă kƀĭn ala Trần Thanh Mẫn mñă ktang, klei mĭn mbha gưl ktang kơ knŭk kna čiăng kơ knŭk kna čŏng pô bi klă hŏng ai tiê hluê boh sĭt jing giê mkă čiăng mgaih msir dŭm klei dleh kpăk čiăng bi hluh ai dưi đĭ kyar. Khua bruă kƀĭn ala Trần Thanh Mẫn mñă ktang, dŭm boh klei dưi bi klă srăng mgaih msir mtam.

Boh nik, amâo djŏ kyua dŭm klei čuăn, hră mơar dleh bi êmưt klei đĭ kyar lăn čar. Khua Bruă Kƀĭn Ala lač, êjai brei klei blŭ mguôp mkra mlih dŭm hdră bhiăn djŏ tuôm srăng lŏ dơ̆ng ksiêm dlăng, čiăng rơ̆ng găl guôp hŏng dŭm klei čuăn hlăm hdră bhiăn phŭn. Bi hŏng hdră bhiăn mkŏ ming  bruă sang čư̆ êa alŭ wăl (mkra mlih) srăng mbha gưl ktang hĭn kơ bruă sang čư̆ êa alŭ wăl hluê hdră, alŭ bi klă, alŭ wăl ngă, alŭ wăl đua klam. Hluê anăn, klei čŏng pô mơ̆ng alŭ wăl srăng dưi mđĭ hĭn. Bruă mkra mlih hdră bhiăn mkŏ mjing knŭk kna srăng jao klei dưi kơ knŭk kna mbha gưl ktang kơ alŭ wăl, Bruă Kƀĭn Ala srăng mđĭ bruă ktuê dlăng.