Khua bruă kƀĭn ala Trần Thanh Mẫn đăo knang ti gŭ klei gĭt gai mơ̆ng Đảng, klei ksiêm dlăng tŭ dưn mơ̆ng Bruă Kƀĭn Ala leh anăn klei gĭt gai mơ̆ng knŭk kna, lăn čar leh anăn mnuih ƀuôn sang Lào srăng găn jih jang klei dleh dlan, hluê ngă tŭ jing hdră mtrŭn klei kƀĭn trông tal 11 leh anăn mkŏ mjing tŭ jing klei kƀĭn kluôm bruă Đảng dŭm gưl, anăp truh kơ klei kƀĭn kluôm bruă Đảng kluôm ala tal 12 ti thŭn 2026.

Khua bruă kƀĭn ala Trần Thanh Mẫn mñă kơ Bruă Kƀĭn Ala dua ala čar lŏ dơ̆ng bi mguôp kjăp, hrăm mbĭt ktuê dlăng bruă hluê ngă dŭm klei kuôl kă gưl dlông, mđĭ hĭn klei bi trông êpul, kah mbha klei hưn, klei hriăm hlăm bruă mkŏ dăp, bi khuăt dŭm anôk bruă Bruă Kƀĭn Ala, bruă čih mkra hdră bhiăn, mkŏ mjing dŭm êpul ktuê dlăng mbĭt, mtrŭt mjhar knŭk kna, dŭm phŭn, dhar bruă, alŭ wăl leh anăn knơ̆ng bruă hluê ngă jăk klei bi klă mbĭt Việt Nam – Lào.