Anôk bruă ngă hră mơar ƀuôn hgŭm Tân Lập čar Dak Lak mâo mprăp lu mta maĭ mŏk, êdah êdi jing dua boh maĭ tĭng mkŏ dưm kdrăp ba yua klei thâo anak mnuih AI, đru kơ mnuih ƀuôn sang ksiêm dlăng, ba mơĭt hră mơar lehanăn tui ksiêm klei ngă hră mơar online. Ayŏng Lê Văn Toàn nao ngă hră mơar kơ anak brei thâo, ñu mâo mnuih mă bruă tinei ktrâo lač kơ hdră ba yua AI tŭ dưn êdi.

“Phung đoàn viên êdam êra đru kơ kâo hưn mdah klei hâo hưn, leh kơnăn maĭ srăng kđăm hră kơ kâo. Ngă hră mơar ară anei gơ̆ mkŏ hgŭm hŏng klei hâo hưn kơ anôk pô dôk lehanăn hră ênua, jăk găl êdi. Mguôp AI hlăm klei ngă hră mơar đru kơ klei dưi bi hrŏ mmông nao ngă, hdră ngă ăt găl hĭn mơh.

Ti anôk bruă ngă hră mơar knŭk kna ƀuôn hgŭm Tân Lập, mâo 9 čô thơ̆ng kơ bruă lehanăn 1 čô knuă druh bruă dăng kông tŭ ngă bruă klam kăp mă lehanăn ba wĭt boh tŭ ngă hră mơar hluê êlan dăng kông, mbĭt hŏng 4 čô đoàn viên êdam êra đru kơ mnuih ƀuôn sang ngă hră. Amai Lê Thị Nguyên Hạnh, knuă druh bruă dăng kông brei thâo, grăp hruê amai đru mơ̆ng 30 – 40 čô ba yua kdrăp AI.

“Pô srăng mŭt phần mềm AI, lehanăn ya hră mơar čiăng ngă pô gư̆ ti maitĭng srăng ƀuh mtam. Si tô hmô čiăng ngă hră bi mlih hdră mnia mblei snăn phần mềm AI srăng ba mdah hdră čiăng ngă, leh kơnăn pô hưn hŏng mnuih ƀuôn sang čiăng digơ̆ mprăp ênŭm hră mơar čiăng ngă, kâo srăng ktrâo lač kơ hdră scan lehanăn ba mơĭt hluê êlan online čiăng bi hrŏ mmông ngă, lehkơnăn phung knuă druh lŏ msir mghaih mă hlăm lam”.

Pŏk ngă AI hlăm hdră ngă bruă knŭk kna, ƀuôn hgŭm Tân Lập ba yua dua mta ứng dụng, mơ̆ng Vietel lehanăn VNPT. Sa mta ứng dụng đru kơ knuă druh tui ksiêm klei hưn kơ bruă ngă hră mơar pral, ứng dụng adôk mđing đru kơ mnuih ƀuôn sang ba yua klei ngă hră mơar hluê êlan online. Tĭng mơ̆ng hruê 1/7 truh kơ ară anei, êbeh 900 mta hră mơar dưi tŭ mă, hlăm anăn êbeh 400 mta hră mơar dưi msir mghaih ti anăp, bi adôk dưi msir mghaih online. Nguyễn Mạnh Hà, Kơiăng khua Anôk bruă sang čư̆ êa ƀuôn hgŭm, Khua anôk bruă ngă hră mơar  ƀuôn hgŭm Tân Lập mñă, bruă ba AI hlăm hdră msir mghaih hră mơar amâo djŏ knŏng đru kơ phung knuă druh ngă hră mơar pral ƀiădah lŏ mđĭ hnơ̆ng tŭ jăk mkăp hdră mă bruă kơ mnuih ƀuôn sang.

 “Hmei hưn mthâo leh kơ mnuih ƀuôn sang thâo kơ klei anei. Mnuih ƀuôn sang hriê ngă hră mơar, hmei mtă kơ ayŏng amai adei nao ktrâo lač kơ mnuih ƀuôn sang hdră ngă pral hĭn. Ară anei ngă hŏng kngan, êdei anei srăng tĭng ba yua amĭ mŏk, drei knŏng lač mă snăn maĭ srăng mkăp mtam klei hâo hưn.

Bruă ba yua AI ti ƀuôn hgŭm Tân Lập jing sa hlăm dŭm hdră hlăm bruă bi mlih mrô mơ̆ng kluôm čar. Hruê 10/7 leh êgao, Dak Lak klă klơ̆ng ba yua 4 tur knơ̆ng mrô hlăm anôk bruă knŭk kna 2 gưl: Tur knơ̆ng klei thâo anak mnuih đru kơ mnuih ƀuôn sang tui ksiêm, ba mơĭt hră mơar; tur knơ̆ng bruă knŭk kna online, dashboard (anôk kriê dlăng) bi mguôp hdră kriê dlăng mơ̆ng dŭm gưl lehanăn kdrăp msir mghaih klei hưn lač mơ̆ng êpul êya.

Leh ksiêm dlăng boh sĭt bruă ba yua kdrăp klei thâo anak mnuih hlăm bruă msir mghaih klei ngă hră mơar ti ƀuôn hgŭm, Đỗ Hữu Huy, kơiăng khua bruă Đảng čar, Kơiăng khua Anôk gĭt gai kơ hdră mđĭ kyar bruă kreh knhâo, kdrăp mrâo lehanăn bi mlih mrô čar Dak Lak mñă klă, anei jing knhuang yuôm bhăn čiăng mđĭ boh tŭ dưn hdră mă bruă knŭk kna hlăm wưng mrâo.

 “Leh bi mŭt să, ƀuôn hgŭm snăn wăl anôk srăng prŏng hĭn, knuă druh lu mơh ƀiădah hŏng ênoh bruă mâo mbha kơ gưl să lu êdi, snăn klei ba yua AI yuôm bhăn snăk, bruă pŏk ngă, snăn ƀuôn hgŭm jing pô kăp ktrâo lač, bi pô hluê ngă bruă msir mghaih brei thâo klă lehanăn ktrâo lač kơ mnuih ƀuôn sang djŏ klei digơ̆ čiăng lehanăn brei drei msir mghaih pral.

Klei Dak Lak pral pŏk ngă AI hlăm bruă msir mghaih klei ngă hră mơar, mphŭn mơ̆ng gưl nah gŭ, brei ƀuh klei gĭr hluê ngă bruă knŭk kna mrô, bi mlih mrô mkăp kơ mnuih ƀuôn sang. Anei ăt jing sa knhuang yuôm bhăn hlăm hdră mkŏ mjing bruă knŭk kna mrâo mrang, klă mngač, tŭ dưn./.