Ƀri wưng Têt Djuê ana Ất tỵ 2025 anăp truh lehanăn mđing truh knăm bi hdơr 95 thŭn Hruê mkŏ mjing Đảng Cộng sản Việt Nam, aguah 16/1 ti Nam Định, Khua gĭt gai Đảng Tô Lâm djă akŏ êpul mă bruă Gưl dlông nao dưm kwang mnga, čuh brui mngưi bi hdơr kơ Khua gĭt gai Đảng Trường Chinh ti Knưng bi hdơr lehanăn Sang kriê pioh mnơ̆ng Khua gĭt gai Đảng Trường Chinh. Khua gĭt gai Đảng Trường Chinh anăn sĭt jing Đặng Xuân Khu, kkiêng huê 9/2/1907, hlăm sa gŏ sang ksiêm hriăm lu khăp kơ ala čar, jiă knhuah dhar kreh, pô hriăm thâo kdlưn hĭn ti ƀuôn Hành Thiện, să Xuân Hồng (Xuân Trường). Êbeh 60 thŭn mă bruă cách mạng, mơ̆ng thŭn 1925 truh kơ thŭn 1988, ñu mâo đăo knang păn ngă lu bruă klam yuôm bhăn mơ̆ng Đảng lehanăn Knŭk kna…

Hŏng ya kơhưm, mă bruă ti ya anôk, Trường Chinh bi êdah jing sa čô knuă druh kiă kriê thâo kdlưn, jih ai tiê kơ bruă, khăp kơ mnuih ƀuôn sang, jih ai tiê duh myơr, kdơ̆ng mblah kyua klei êđăp ênang, hnŭk êngiê mơ̆ng Ala čar, kyua klei yâo mơak mơ̆ng mnuih ƀuôn sang. Jing hđeh hriăm hră êdah kdlưn mơ̆ng Khua gĭt gai Hồ Chí Minh, pô mă bruă cách mạng thâo, pô mă bruă kđi čar knhâo, Khua gĭt gai Đảng Trường Chinh lui leh kơ Đảng lehanăn Knŭk kna lu ngăn dăn djŏ tuôm kơ klei hlak mblang bruă kđi čar yuôm bhăn, hlăm anăn mâo “Hră hưn mdah kluôm kơ dhar kreh Việt Nam” truh kơ ară anei, dŭm klei mĭn kơ knhuah dhar kreh mơ̆ng ñu ăt dôk hrông snăn, jing klei hriăm yuôm bhăn kơ Đảng hlăm hdră mkŏ mkra lehanăn răng mgang Ala čar Việt Nam yang ƀuôn ngă phŭn./.