Khua gĭt gai Đảng bi mni kơ dŭm klei đru mguôp mơ̆ng Pô bi ala hlăm bruă mtrŭt mđĭ klei bi mjĕ ƀĭng hgŭm phŭn Việt Nam – Philippines; mbĭt anăn mñă thŭn 2025 jing thŭn kruăk 10 thŭn mkŏ mjing klei bi mjĕ ƀĭng hgŭm phŭn mơ̆ng dua ala čar. Khua gĭt gai Đảng mtă kơ dua tĭng mđĭ hĭn hdră bi hgŭm hlăm bruă kđi čar – bruă hŏng tač êngao, mtrŭt mđĭ klei bi trông gưl dlông; gĭr bi mâo ênoh prăk bi mnia mblei dua nah hnưm dưi truh 10 êklai USD.

Êngao anăn, dua tĭng brei mđĭ hdră bi hgŭm hlăm bruă lĭng kahan – răng mgang klei êđăp ênang, bruă dhar kreh, mjuăt bi hriăm, mdrơ̆ng hŏng klei bi mlih yan adiê. Khua gĭt gai Đảng Tô Lâm mñă, Việt Nam srăng sa ai hŏng Philippines đua klam ngă Khua kiă kriê ASEAN thŭn 2026, mbĭt anăn bi hgŭm kjăp hŏng dŭm ala čar ASEAN mkăn kñăm mđĭ lar bruă klam phŭn mơ̆ng êpul, mkŏ mjing sa êpul êya ASEAN hgŭm mguôp, đĭ kyarhơĭt kjăp.