Mđing truh bi hdơr 100 thŭn hruê mkŏ mjing Đảng cộng sản Việt Nam (3/2/1930-3/2/2030), aguah mbruê 15/1, Adŭ bruă Đảng gưl dlông mkŏ mjing knăm mphŭn pŏk hdră mkra wĭt, mđĭ hnơ̆ng leh anăn rŭ mdơ̆ng mrâo wăl sang tuê Hồ Tây, Anei jing hdră mphŭn kčưm čiăng lŏ dơ̆ng ngă dŭm hdră Mkŏ mjing Sang kriê pioh hƀuê ênuk Đảng cộng sản Việt Nam leh anăn hdră êlan mlih mrô hlăm dŭm anôk bruă đảng. Hlăm knăm mphŭn pŏk ngă hdră, Khua gĭt gai Đảng Tô Lâm mbĭt hŏng phung khua gĭt gai Đảng, knŭk kna leh anăn ƀuôn prŏng Hà Nội gư̆ asăp mtrŭn mphŭn pŏk ngă bruă.

Hdră mkra wĭt, mđĭ hnơ̆ng leh anăn rŭ mdơ̆ng mrâo wăl sang tuê Hồ Tây dưi rŭ mdơ̆ng srăng jing anôk mkŏ mjing dŭm hdră, bruă kđi čar hlăm lăn čar, hŏng tač êngao, dŭm mta bruă yuôm bhăn mơ̆ng Đảng, knŭk kna, mkŏ mjing klei kƀĭn phung bi ala kluôm ala mơ̆ng Đảng, mkŏ mjing klei drông tuê ala tač êngao hriê čuă, mă bruă leh anăn mkŏ mjing dŭm klei kdŏ mmuñ bi hdor dŭm hruê knăm prŏng mơ̆ng lăn čar. Anei jing hdră mâo boh tŭ dưn kđi čar yuôm bhăn mđing truh tŭ drông klei Kbĭn kluôm ala bruă Đảng tal 14, đru mguôp hlăm klei đĭ kyar bruă duh mkra, dhar kreh leh anăn yang ƀuôn mơ̆ng ƀuôn prŏng phŭn êbâo thŭn duh myơr, lŏ jing gru kruăk knăl mơ̆ng Việt Nam hŏng mah jiăng tar rŏng lăn.