Hluê si klei hưn, hlăm wưng klei mkăp êa pui tar rŏng lăn dleh dlan, hluê ntgă klei gĭt gai mơ̆ng Knŭk kna, dŭm phŭn, dhar bruă nao hgŭm hrăm mbĭt, boh nik jing phŭn bruă tuh tia mnia mblei čiăng bi hơĭt ênoh êa săng, êa pui. Êpul bruă rơ̆ng mâo djăp êa pui ba mdah leh hdră êlan čiăng bi hơĭt leh anăn ksiêm dlăng boh sĭt êa săng, êa pui hlăm mlan 3, mprăp kơ hdră êlan hlăm dŭm mlan kơ anăp. Blŭ hrăm hlăm klei kƀĭn, Khua Knŭk kna Phạm Minh Chính mñă klă mta kñăm amâodưi brei kƀah êa pui hlăm djăp boh klei.

Khua Knŭk kna Phạm Minh Chính čih leh hră mơĭt kơ phung khua gĭt gai djŏ tuôm hŏng bruă êa pui, mtrŭt mđĭ bruă hŏng tač êngao hlăm wưng klei dleh dlan, dŭm phŭn, dhar bruă, ngă bruă hur har hluê si bruă klam, duah phŭn mkăp, mbĭt anăn ba mdah mtam hdră mtrŭn đru mkra mlih găl guôp ênoh êa săng, êa pui. Khua Knŭk kna mñă brei bi lu jơr mphŭn mkăp êa pui, hluê ngă mtam boh tŭ klei blŭ hrăm mơ̆ng Knŭk kna hŏng dŭm ƀĭng hgŭm msĕ si UAE, Kuwait,...  čiăng mđĭ hĭn phŭn mkăp, rơ̆ng mâo 305 êa săng êa pui mơ̆ng phŭn blei mnia.

Hlăm wưng ară anei, Khua Knŭk kna iêo mthưr mnuih ƀuôn sang amâo mâo kdjăt, hŭi, amâo mâo ngơi mang. Jih jang mnuih ƀuôn sang bi mguôp, sa ai găl klei dleh dlan, amâo mâo bi nao kluh blei ngă mtŭk mtŭl anôk mnia mblei, mkăm pioh, mđĭ ênoh…Khua Knŭk kna jao kơ Phŭn bruă tuh tia mnia mblei ksiêm duah hluê ngă hdră êlan mkăm pioh êa pui ala čar, mkŏ mjing hdră êlan čŏng pô mkăp êa pui kơ lăn čar, Phŭn bruă ngăn prăk mkăn ngăn prăk mơ̆ng ênoh prăk mkăp čiăng bi hơĭt êa pui kơ lăn čar.