Hlăm mmông tŭ drông, Khua Knŭk kna mñă ktang, Việt Nam dlăng yuôm leh anăn hmăng hmưi amâo mâo mdei klei mđĭ kyar klei mjĕ giăm knhuah gru leh anăn ƀĭng hgŭm hdră êlan kluôm dhuôm hŏng Russia. Khua Knŭk kna bi myuôm bruă Êpul grŭp dưi đĭ kyar pral leh anăn hmao mă bruă hŏng êpul grŭp, knơ̆ng bruă prŏng  mơ̆ng Việt Nam hlăm wưng êgao, mñă kơ êpul grŭp duh bi liê lu hĭn ti Việt Nam, dŭm knơ̆ng bruă dua tĭng bi mguôp kjăp, tŭ dưn hĭn čiăng ngă dŭm klei kuôl kă mơ̆ng khua gĭt gai gưl dlông.

Lač jăk kơ Khua Knŭk kna Phạm Minh Chính mâo leh mmông tŭ drông, Vladimir Petrovich Evtushenkov brei thâo, AFK Sistema jing êpul; grŭp êngao Knŭk kna prŏng hĭn mơ̆ng Russia hŏng hlăm brô 300 čô mnuih mă bruă, mnia mblei hlăm lu mta bruă: Dăng kông, bruă mrô, kdrăp mrâo mrang, mnia mblei điện tử, bruă mdrao mgŭn, mkra mjing kyâo leh anăn rŭ mdơ̆ng sang kyâo, bruă lŏ hma, êa drao gŭn, anôk mdei msăn…Ñu mñă klă srăng gĭr mtrŭt mđĭ klei bi mguôp hŏng Việt Nam hlăm dŭm mta bruă mâo Khua Knŭk kna gĭt gai, mprăp ba jao kdrăp mrâo mrang, mtô mjuăt mnuih mă bruă kơ Việt Nam čiăng ba wĭt boh tŭ dưn hơĭt kjăp kơ jih dua tĭng./.