Ti anôk bi tuôm, Khua Anôk bruă kƀĭn ala Szymon Holownia bi mni gưl hiu čhưn mơ̆ng Khu knŭk kna Phạm Minh Chính, dlăng anei jing gru kruăk hlăm klei bi mjĕ Việt Nam – Poland hlăk thŭn anei dua ala čar bi hdơr 75 thŭn hruê mkŏ mjing klei bi mjĕ (1950-2025).

Khua knŭk kna Phạm Minh Chính lač jăk klei tŭ drông mơ̆ng Khua Anôk bruă kƀĭn ala nah gŭ Szymon Holownia mbĭt hŏng phung khua hlăm Anôk bruă brei kơ Êpul bi ala gưl dlông Việt Nam, mñă mta kñăm mơ̆ng gưl hiu čhưn čiăng mtrŭt mđĭ klei bi mjĕ hgŭm bruă hlăm lu mta plah wah dua ala čar hlăm djăp mta ra bruă, mbĭt anăn ksiêk kjăp hĭn klei bi mguôp dua djuê ana Việt Nam – Poland.

Mñă klei yuôm bhăn mơ̆ng hdră bi hgŭm mnia mblei – duh bi liê hlăm klei bi mjĕ dua ala čar, Khua knŭk kna Phạm Minh Chính lehanăn Khua Anôk bruă kƀĭn ala nah gŭ Szymon Holownia tŭ ư mtrŭt mđĭ hdră bi hgŭm hlăm bruă phŭn anei năng hŏng klei bi mjĕ bruă kđi čar, dhar kreh jăk siam plah wah dua ala čar lehanăn gĭr mâo ênoh prăk bi mnia mblei dua nah truh 5 êklai USD.

Ăt hlăm hruê, Khua knŭk kna Phạm Minh Chính drông leh phung khua anôk bruă duh mkra mrô sa Poland, mâo Êpul group Adamed, anôk bruă êlan phiơr LOT Airlines, mtrŭt mđĭ hdră bi hgŭm duh mkra – duh bi liê plah wah dua ala čar./.

Êlâo kơnăn, aguah mbruê 17/1, hluê mmông alŭ wăl, Khua knŭk kna Phạm Minh Chính nao čuă leh anăn mâo klei blŭ hrăm hră êlan yuôm bhăn ti sang hră gưl prŏng Warsaw, Poland. Klei blŭ hrăm mâo akŏ “ba klei mjĕ giăm Việt Nam – Poland đĭ hnơ̆ng hĭn, kyua klei êđăp ênang leh anăn đĭ kyar mơ̆ng dua alŭ wăl Ngŏ Dhŭng Asi leh anăn krah Ngŏ Ơrôp”. Sang hră gưl prŏng Warsaw jing klei bi hmô kơ klei bi mguôp hơ̆it kjăp plah wah Việt Nam leh anăn Poland hlăm bruă sang hră mơar.

Dŭm êtuh čô hriăm gưl prŏng leh anăn knuă druh Việt Nam dôk hriăm ti sang hră. Lač kơ hdră tă kơ klei mjĕ giăm Việt Nam – Poland, Khua knŭk kna Phạm Minh Chính mñă klă, Việt Nam dlăng yuôm bhăn leh anăn čiăng mtrŭt mđĭ klei, bi êlam hĭn klei bi mguôp kluôm dhuôm hŏng dŭm ala čar krah Ngŏ Ơrôp, boh nik jing dŭm ala čar mah jiăng msĕ si Poland. Khua knŭk kna kah mbha kơ 6 klei kdlưn hĭn ba klei mjĕ giăm Việt Nam – Ponland đĭ ti hnơ̆ng mrâo.