Dua čô Khua knŭk kna  bi myuôm klei mjĕ giăm Việt Nam – japon, boh nik mơ̆ng leh mđĭ jing ƀĭng hgŭm bi mguôp hdră êlan kluôm dhuôm. Khua knŭk kna Phạm Minh Chính mñă ktang Japon jing ƀĭng hgŭm mrô 1 leh anăn đăo knang mơ̆ng Việt Nam, mbĭt anăn hmăng hmưi mtrŭt mđĭ klei bi mguôp hlăm djăp mta bruă, boh nik hlăm bruă duh mkra, mlih mrô, pui kmlă, bruă mkŏ mkra leh anăn mtô mjuăt mnuih mă bruă.

Khua knŭk kna Ishiba bi myuôm kơhưm, bruă klam mơ̆ng Việt Nam hlăm alŭ wăl leh anăn tar rŏng lăn, mñă klă Japon srăng lŏ dơ̆ng hrăm mbĭt hŏng Việt Nam hlăm ênuk mrâo, đru kơ Việt Nam đĭ kyar bruă duh mkra – ala ƀuôn, mkŏ mjing bruă duh mkra êngiê, čŏng pô, ngă bruă bi mrâo mrang, mđĭ kyar klei kreh knhâo mrâo mrang. Dua tĭng bi tŭ ư rơ̆ng kơ klei bi tuôm gưl dlông jêñ jêñ, mđĭ hĭn klei bi mguôp răng mgang klei êđăp ênang êa ksĭ, bi hơĭt wăl duh bi liê mnia mbei leh anăn đru kơ dŭm mta bruă mrâo.