Aguah mbruê (22/5), ti Anôk bruă Knŭk kna, Khua knŭk kna Phạm Minh Chính gĭt gai Klei bi kƀĭn Knŭk kna thơ̆ng kơ bruă čih mkra hdră bhiăn mlan 5/2025, brei klei blŭ, bi mklă 2 Klei čih mkra hdră bhiăn lehanăn 4 Klei akâo čiăng čih mkra hdră bhiăn.

Ti anôk bi kƀĭn, phung bi ala bi trông brei leh klei blŭ kơ 2 klei čih mkra hdră bhiăn mâo: Klei čih mkra Hdră bhiăn hluê ngă bruă ngă soh jhat (mkra mlih), Klei čih mkra Hdră bhiăn hluê ngă bruă mă kơ̆ng êjai lehanăn kăm đuê̆ mơ̆ng anôk dôk lehanăn 4 klei akâo čih mkra hdră bhiăn mâo: Hdră bhiăn mkiêt mkriêm, bi kdơ̆ng hŏng klei bi liê pliă plia; Hdră bhiăn bi mklă bruă hluê ngă hdră bhiăn (mkra mlih); Hdră bhiăn klei doh êƀăt mnơ̆ng dhơ̆ng (mkra mlih), Hdră bhiăn Ênoh mnuih. Phung bi ala ti anôk bi kƀĭn mđing bi trông kơ klei kčah mtrŭn ba myơr dŭm mta mô hlăm asei mlei phung ngă soh; klei dưi bruă klam mơ̆ng anôk krư̆ kđăl hlăm bruă tŭ mă mnơ̆ng, prăk kăk mâo phung mnă, găp djuê čŏng čiăng ba ti sang mnă čiăng hluê ngă bruă phat mkra, jao kơ anôk bruă hluê ngă klei phat mkra; klei djŏ tuôm kơ phung ngă soh jing mnuih ala tač êngao, bruă hluê ngă klei phat mkra mơ̆ng phung mnă, klei đua klam mơ̆ng anôk bruă kahan ksiêm hlăm hdră bi hgŭm tui duah phung ngă soh tlĕ đuê̆ lehanăn hdră mtrŭn mđĭ hnơ̆ng thâo mơ̆ng anôk bruă lehanăn êpul ksiêm bi mklă bruă hluê ngă hdră bhiăn./.