Đăo tĭng ênoh tĭng tla mơ̆ng akŏ thŭn truh kơ hruê 30/4 thŭn anei truh êbeh 128 êbâo êklai prăk, mâo êbeh 15% hdră kčah Khua knŭk kna jao, wưng anei thŭn 2024 mâo mkăp 110 êbâo êklai prăk, mâo êbeh 16%. Snăn, kơ hnơ̆ng yuôm, thŭn 2025 mkăp prăk lu hĭn mkă hŏng thŭn 2024 hlăm brô 18 êbâo êklai prăk, ƀiădah ênoh mkăp prăk mkă hŏng phŭn mkăp prăk Khua knŭk kna jao gơ̆ ƀiă hĭn. Blŭ ti knăm anei, Khua knŭk kna Phạm Minh Chính lač snei: Drei hlăk dôk hlăm dŭm hruê mlan hƀuê ênuk, hŏng ai tiê “Pral kdal, jhŏng” khădah snăn hdră duh bi liê knŭk kna amâo djŏ knŏng amâo mâo “Pral kdal, jhŏng” ƀiădah lŏ êmưt.

Mñă kơ dŭm boh kdrŭt mrâo hlăk dôk mtrŭt mđĭ msĕ si: Kdrăp kreh knhâo, mrâo mrang, mlih mrâo, mlih mrô, hdră duh mkra kluôm, hdră duh mkra êngao knŭk kna… mrâo mphŭn čô̆, ka mâo boh tŭ snăn brei drei lŏ gĭr hĭn, mđĭ ktang hĭn boh kdrŭt dôk mâo, hlăm anăn mâo hdră mtrŭt mđĭ klei duh bi liê knŭk kna. Khua knŭk kna brei bi mni, pah mni, dŭm phŭn, dhar bruă, alŭ wăl mkăp prăk duh bi liê knŭk kna lu, mbĭt anăn mtă brei ksiêm dlăng, mă klei hriăm, bi mklă klei đua klam hŏng êpul, mnuih djŏ tuôm, hluê anăn ba mdah dŭm hdră msir djŏ guôp čiăng mtrŭt mđĭ bruă mkăp ngăn prăk hlăm wưng ti anăp.