Aguah mbruê 8/8, bi klă hlăm klei kƀĭn Êpul gĭt gai knŭk kna kơ dŭm bruă mkŏ mkra, hdră ala čar yuôm bhăn bruă êlan klông leh anăn dŭ mdiăng, Khua knŭk kna Phạm Minh Chính mñă kơ phung duh bi liê, phung ngă bruă bi mguôp hŏng dŭm alŭ wăl hnưm ruh mgaih klei dleh dlan, kpăk gun dŭm hdră mkra êlan klông ară anei.

Dŭm hdră mkra êlan klông dôk ngă bruă hlăm brô 1.700 km hlăm djăp krĭng kwar lăn čar, hlăm anăn mâo hlăm brô 1.200 km mĭn tĭng srăng bi leh ti thŭn 2025 čiăng mâo djăp ênoh km êlan dơ̆ng pral hlăm lăn čar jing êbeh 3.000km. Khua knŭk kna mñă kơ dŭm phŭn, dhar bruă, alŭ wăl, boh nik jing phung duh bi liê, phung ngă bruă sa ai, ngă tŭ dưn dŭm hdră bi lông ktưn “500 hruê trŭn kơ bruă bi leh dŭm êlan dơ̆ng pral” čiăng kkuh drông Klei kƀĭn kluôm bruă Đảng dŭm gưl, mđing truh kơ klei kƀĭn kluôm tal 15 mơ̆ng Đảng, bi hdơr 80 thŭn hruê mkŏ mjing lăn čar, 50 thŭn hruê sua wĭt klei êngiê kwar Dhŭng, hluh hlir lăn čar.