Hŏng akŏ: "Ngă pral klei bi ktưn, bluh đĭ bruă mkŏ mjing êpul kahan ksiêm yang ƀuôn klă sĭt doh mngač, kjăp ktang, knhăk ênuk mrâo”, ti anôk bi kƀĭn prŏng bruă bi ktưn “kyua klei êđăp ênang lăn čar”  tal 9 mâo phŭn bruă kahan ksiêm mkŏ mjing mlam hrue (6/8), ti Hà Nội.  246 čô jing phung kdlưn hĭn, bi ala kơ dŭm êbâo čô mnuih thâo bi hmô “jing mnuih jăk, bruă jăk” hlăm klei bi ktưn “kyua klei êđăp ênang lăn čar” lehanăn kyua bruă “Jih jang mnuih ƀuôn sang bi răng mgang lăn čar”, Lĭng kahan yang ƀuôn lehanăn phung lĭng kahan bi ktưn hlăm kluôm ala nao ti anôk bi kƀĭn prŏng.

Blŭ hrăm ti anôk bi kƀĭn prŏng,  Khua knŭk kna Phạm Minh Chính lač, dŭm boh tŭ dưn leh mâo mơ̆ng êpul kahan ksiêm dưi đru mguôp leh hlăm bruă bi hơĭt kđi car, mkŏ mjing yang ƀuôn knư̆ hruê dhar kreh, êđăp ênang, klei hdĭp mnuih ƀuôn sang êđăp ênang, h’uh mđao, mjing klei găl kơ klei mđĭ kyar lăn čar. Hŏng lu klei bi hmô, mbĭt hŏng klei mĭn jăk mâo ngă leh hlăm bruă răng mgang klei êđăp ênang yang ƀuôn, mđrăm mbĭt hŏng jih bruă kđi čar, lehanăn mnuih ƀuôn sang bi đru răng mgang klei êđăp ênang lăn čar. Khua knŭk kna mtă kahan ksiêm yang ƀuôn păn kjăp ai tiê klei bi sa ai hŏng mnuih ƀuôn sang răng mgang klei êđăp ênang, bi đru răng kriê kjăp klei êđăp ênang bruă kđi čar, klei êđăp ênang  yang ƀuôn, hơĭt kjăp mđĭ kyar lăn čar./.