Tlam 10/2, Khua knŭk kna Phạm Minh Chính gĭt gai leh Klei bi kƀĭn tal 11 mơ̆ng Anôk gĭt gai bruă Ksiêm wĭt klei hluê ngă Hdră mtrŭn mrô 18-NQ/TW mơ̆ng Gưl dlông. Klei kƀĭn mđing brei klei blŭ kơ bruă mkŏ dăp anôk bruă ksiêm dlăng khuăt, kjăp ktang, ngă bruă tŭ dưn. Hlăm anăn, ksiêm dlăng kơ mta kñăm, klei bhiăn mơ̆ng bruă mkŏ dăp anôk bruă ksiêm dlăng; bi mklă bruă klam, gru hmô mkŏ mjing anôk bruă, ba mdah hdră mkŏ dăp anôk bruă ksiêm dlăng hluê 2 gưl ti Gưl dlông lehanăn alŭ wăl jing gưl čar.

Blŭ hrăm klah čŭn ti knăm anei, Khua knŭk kna Phạm Minh Chính mñă, bruă mkŏ dăp anôk bruă ksiêm dlăng brei mdưm boh tŭ dưn mơ̆ng ala čar, mơ̆ng mnuih ƀuôn sang jing tal êlâo hĭn; hluê ngă kjăp hdră êlan mtrŭn mơ̆ng Đảng, Knŭk kna, rơ̆ng mta kñăm bi hrŏ ênoh mnuih mă bruă, mđĭ boh tŭ dưn hdră mă bruă mơ̆ng anôk bruă ksiêm dlăng. Mbĭt hŏng anăn, bruă mkŏ dăp brei msir mghaih jih klei gun kpăk, êdu kƀah, mđĭ mđăl hlăm bruă mkŏ mjing, hdră ngă bruă mơ̆ng anôk bruă ksiêm dlăng msĕ ară anei. Khua knŭk kna mtă kơ Anôk bruă ksiêm dlăng knŭk kna, Phŭn bruă ksiêm dlăng mnuih mă bruă, anôk bruă djŏ tuôm mjêč čih mkra čiăng ba mdah kơ Phŭn bruă kđi čar lehanăn anôk gĭt gai Gưl dlông ksiêm dlăng, ba mdah kơ Anôk bruă kƀĭn ala leh Phŭn bruă kđi čar brei klei blŭ./.