Leh mphŭn pŏk Klei bi kƀĭn mjêč tal 9, phung bi ala Anôk bruă kƀĭn ala bi trông leh kơ Klei čih mkra ti êpul kơ Hdră bhiăn mkra mlih, thiăm bŏ dŭm mta hlăm Hdră bhiăn mkŏ mjing Anôk bruă kƀĭn ala lehanăn Hdră bhiăn ba mdah hră mơar kčah mtrŭn djŏ hdră bhiăn (mkra mlih).

Bi trông ti êpul, Khua lăn čar Lương Cường mñă leh kơ mta kñăm mđing truh jing khuăt, ngă bruă tŭ dưn. Bruă mkŏ wĭt anôk bruă mrâo brei ngă bruă jăk hĭn, tŭ dưn hĭn. Čiăng kơ anôk bruă ngă bruă tŭ dưn, mơ̆ng hdră ksiêm dlăng adôk kpăk gun êbeh 5.000 Hdră bhiăn lehanăn hră mơar djŏ tuôm kơ Hdră bhiăn, hlăm anăn mâo êbeh 200 hdră bhiăn brei lŏ mkra mlih, thiăm mbŏ. Khua lăn čar mtă ti anôk bi kƀĭn mjêč tal 9 anei mđing mkra mlih 4 hdră bhiăn lehanăn 5 hdră mtrŭn djŏ tuôm kơ bruă mkŏ mjing hdră hluê ngă Hdră mtrŭn mrô 18. Khua lăn čar mtă brei mđing klei blŭ hlăm bruă čih mkra Hdră bhiăn mkra mlih, thiăm mbŏ dŭm mta hlăm Hdră bhiăn mkŏ mjing Anôk bruă kƀĭn ala lehanăn Hdră bhiăn ba mdah hră mơar kčah mtrŭn djŏ hdră bhiăn (mkra mlih),  bruă mkra mlih brei djŏ guôp hŏng boh sĭt lehanăn mđing kơ mta kñăm mkŏ mjing anôk bruă jăk hĭn, kjăp ktang hĭn./.