Tlam 28/4, ti čar Hà Tĩnh, Khua lăn čar Lương Cường drông leh Khua gĭt gai Đảng, Khua lăn čar Lào Thongloun Sisoulith ƀri gưl ñu hriê ti Việt Nam nao hlăm knăm mphŭn ba yua kdrŭn ksĭ mrô  3 - Kdrŭn ksĭ Vũng Áng - sa hlăm dŭm hdră bruă yuôm bhăn mkŏ bruă duh mkra plah wah dua ala čar leh anăn nao hlăm knăm bi hdơr 50 thŭn mtlaih êngiê kwar Dhŭng, hluh lir lăn čar.

Hlăm mmông drông, Khua lăn čar hơễc hmưi leh anăn bi mni kơ boh tŭ lăn čar Lào mâo leh hlăm wưng êgao leh anăn bi êdah klei đăo knang ti gŭ klei gĭt gai mơ̆ng Đảng yang ƀuôn Cách mạng Lào, khua gĭt gai jing Thoong-lun Xi-xu-lít, lăn čar Lào srăng lŏ dơ̆ng mâo lu klei tŭ dưn mrâo, prŏng hĭn, hlue ngă tŭ dưi Hdră mtrŭn Klei bi kƀĭn tal XI, mkŏ mjing tŭ jing Klei bi kƀĭn bruă Đảng yang ƀuôn cách mạng Lào tal XII. Kơ bruă mphŭn ba yua kdrŭn ksĭ mrô 3, Kdrŭn ksĭ Vũng Áng srăng ngă djŏ klei čiăng dŭ mdiăng mnơ̆ng dhơ̆ng ƀrư̆ hruê ƀrư̆ đĭ mơ̆ng dua ala čar, duh jăk kơ bruă dŭ mdiăng găn kdrŭn ksĭ leh anăn mnia blei bi hgŭm hŏng ala čar Lào, mơ̆ng anăn đru mguôp hlăm klei đĭ kyar leh anăn ñŭ kma bruă duh mkra grăp ala čar.