Mmăt 6/8, Khua lăn čar Lương Cường lehanăn Mô̆ ñu mbĭt hŏng êpul bi ala gưl dlông Việt Nam truh ti ƀuôn prŏng phŭn Lu-an-đa (Luanda), mphŭn gưl nao čhưn ti Angola hluê asăp jak iêu mŏng Khua mil čhil Giao Ma-nu-ên Gôn-xan-vét Lâu-ren-xô (João Manuel Gonçalves Lourenço) lehanăn Mô̆ ñu.

Anei jing gưl hiu čhưn gưl dlông tal êlâo mơ̆ng sa čô khua kiă kriê Việt Nam tĭng mŏng thŭn 2008. Gưl hiu čhưn mŏng Khua lăn čar Lương Cường dưi mkŏ mjing djŏ hŏng wưng dua ala čar bi hdơr 50 thŭn hruê mkŏ mjing klei bi mjĕ. Tĭng mơ̆ng hruê 6 – 8/8, Khua lăn čar Lương Cường srăng bi trông hŏng Khua mil čhil João Manuel Gonçalves Lourenço (Giao Ma-nu-ên Gôn-xan-vét Lâu-ren-xô); bi tuôm hŏng Khua anôk bruă kƀĭn ala Carolina Cerqueira; bi tuôm hŏng phung khua kiă kriê Đảng êpul mnuih ƀuôn sang mtlaih êngiê Angola; bi tuôm hŏng mnuih Việt Nam ti Angola lehanăn nao ti knăm bi hdơr 50 thŭn hruê mkŏ mjing klei bi mjĕ 2 ala čar. Boh nik, Khua lăn čar srăng mâo klei blŭ hrăm yuôm bhăn ti anôk bruă kbĭn ala Angola, mơ̆ng anăn ba asăp hưn mthâo kơ hdră mtrŭn sa Việt Nam čiăng đru mguôp lu hĭn hlăm hdră kđi čar tar rŏng lăn, hdră duh mkra tar rŏng lăn lehanăn klei kreh dhar anak mnuih./.