Blŭ hrăm tinei, bi ala kơ khua gĭt gai Đảng, knŭk kna, Khua lăn čar Lương Cường mâo klei hơêč hmưi, pah mni dŭm boh tŭ dưn mơ̆ng phung knuă druh, lĭng kahan ti kđông kahan knông lăn Bát Mọt mbĭt hŏng mnuih ƀuôn sang hlăm alŭ wăl dưi mâo leh hlăm wưng êgao. Hluê si Khua lăn čar, hlăm wưng kơ anăp, đăo knăl boh sĭt dleh dưi ksiêm dlăng, phung bi roh ăt duah hdră bi rai bruă cách mạng, bi rai klei bi mguôp plah wah dua ala čar Việt Nam – Lào.

Kyuanăn, bruă klam răng mgang klei dưi kiă kriê, klei hluh hlir, kluôm dhuôm lăn čar hlăm wưng mrâo jing ktrŏ sơnăk. Hŏng ai tiê anăn, Khua lăn čar mñă kơ phung knuă druh, lĭng kahan ti kđông kahan Bát Mọt lŏ dơ̆ng bi lar bruă klam jing êpul kmeh gơ̆ng, thơ̆ng kơ bruă hlăm bruă mkŏ mjing, kriê dlăng, răng mgang knông lăn ala čar, đru rơ̆ng kơ klei êđăp ênang, hơĭt kjăp čiăng mđĭ kyar lăn čar, hlăm anăn mâo čar Thanh Hoá.