Să Ea Ktur mâo 8.500 gŏ sang, 38% ênoh mnuih jing anak Ê đê, M’nông, Thái, Tày, Nùng, Dao…. Dŭm thŭn leh êgao, mơ̆ng bruă pla mjing kphê, tiu, boh dủian… klei hdĭp mda mnuih ƀuôn sang ƀrư̆ hrue ƀrư̆ mâo klei trei mđao, gŏ sang ƀun ƀin adôk mă kgŭ 5%.

Hlăm klei mkŏ mjing anei, Đại tướng Lương Tam Quang hơêč hmưi kơ dŭm boh tŭ dưn mnuih ƀuôn sang djăp djuê ana ti Ea Ktur mâo leh hlăm dŭm thŭn êgao. Khua phŭn bruă kahan ksiêm čang hmăng hlăm wưng tinăp, dŭm gưl bruă Đảng, bruă sang čư̆ êa lehanăn mnuih ƀuôn sang Ea Ktur lehanăn hlăm kluôm čar Daklak lŏ dơ̆ng mâo ai tiê thâo bi ktưn, bi leh jih jang ênoh čuăn tui di hdră mtrŭn mơ̆ng klei bi kƀĭn prŏng đảng djăp gưl lŏ dơ̆ng djă pioh bruă leh dưi ngă, lŏ mđĭ di ktang hlăm klei thâo bi mguôp jih jang djuê ana, rŭ mdơ̆ng ƀuôn sang, lăn čar mdrŏng sah, jăk mơak./.