Hơêč hmưi kơ Huỳnh Thành Đạt ngă bruă klam mrâo, Khua Anôk hâo hưn mtô mblang leh anăn čung ba mnuih ƀuôn sang gưl dlông Nguyễn Trọng Nghĩa brei thâo, anei srăng jing sa ai ktang mrâo leh anăn sa klei găl mrâo čiăng kơ Anôk bruă hâo hưn mtô mblang gưl dlông leh anăn čung ba mnuih ƀuôn sang gưl dlông lŏ dơ̆ng bi leh bruă klam ti anăp Đảng, Knŭk kna leh anăn mnuih ƀuôn sang jao.

Huỳnh Thành Đạt amĭ kkiêng ti Bến Tre, mâo hriăm klă klơ̆ng, ngă leh lu bruă. Hlăm bruă jing Khua Phŭn bruă kreh knhâo leh anăn Kdrăp mrâo, Huỳnh Thành Đạt đru mguôp, ba bruă kreh knhâo leh anăn kdrăp mrâo mâo knhuang đĭ kyar êdah kdlưn. Kreh knhâo leh anăn kdrăp mrâo jing sa hlăm dŭm bruă êdah êdi, mđĭ mlih mrâo mbruă, mjing tur knơ̆ng kơ lăn čar mŭt hlăm ênuk mrâo, ênuk kpưn đĭ mơ̆ng djuê ana. Kyua anăn, bruă klam mơ̆ng Anôk bruă hâo hưn mtô mblang leh anăn čung ba mnuih ƀuôn sang gưl dlông ăt brei mđĭ bruă mlih mrô hlăm klei tă hdră klei mĭn, hâo hưn hdră êlan truh kơ phung knuă druh, đảng viên leh anăn mnuih ƀuôn sang.