Knơ̆ng bruă kphê 15, hlăm Êpul kahan krĭng 5 ară anei kriê dlăng êbeh 820 ha kphê leh anăn 130 ha ksu. Ênoh hrui wĭt thŭn anei mâo hlăm brô 150 êklai prăk, klei hdĭp mda mnuih ƀuôn sang mâo lu klei bi mlih, prăk hrui wĭt kah knar grăp mlan grăp čô mâo 9,2 êklăk prăk.

Mbĭt hŏng bruă klam duh mkra, knơ̆ng bruă lŏ mtô bi hriăm, gang mkhư̆ klei yan adiê ngă, tui duah đru dŏng phung mâo klei truh leh anăn gang mkhư̆ klei ruă tưp; gĭr đru kơ mnuih djuê ƀiă krĭng hdră bruă bi hrŏ ƀun hơĭt kjăp; hrăm mbĭt mkŏ mkra krĭng ƀuôn sang mrâo ti alŭ wăl kahan dôk jưh. Hlăm mmông mă bruă, K’iăng Khua bruă kƀĭn ala, Trung tướng Trần Quang Phương gĭt gai Knơ̆ng bruă lŏ dơ̆ng bi mklă hdră đĭ kyar hlăm wưng mrâo; ngă jăk hĭn bruă mkŏ mjing Đảng, mkŏ mjing anôk bruă kjăp ktang kluôm “bi hmô êdah êdi”, ngă jăk bruă čung ba mnuih ƀuôn sang, hrăm mbĭt mkŏ mjing alŭ wăl phŭn ti kwar Krah - Lăn Dap Kngư.