Hlăm mmông drông, K’iăng Khua knŭk kna Bùi Thanh Sơn bi mklă klei mĭn sa anăn mơ̆ng Việt Nam jing sa ai hŏng hdră msir dua knŭk kna, hlăm anăn mâo bruă mkŏ mjing sa Knŭk kna Palestin êngiê leh anăn mâo klei dưi, mơ̆ng êlan knông lăn êlâo thŭn 1967 hŏng Ngŏ Jerusalem jing ƀuôn prŏng, djŏ guôp hŏng hdră bhiăn lu ala čar leh anăn hdră mtrŭn djŏ tuôm mơ̆ng Êpul hgŭm lu ala čar.

Pô bi ala mơ̆ng Khua mil čhil Palestine bi mklă Việt Nam jing gru mngač, klei mđĭ ai kơ mnuih ƀuôn sang Palestine lŏ dơ̆ng bi blah sua mă klei dưi kiă kriê leh anăn  klei dưi mkŏ mjing Knŭk kna Palestine êngiê. Dua tĭng tŭ ư lŏ dơ̆ng duah hdră msir klei dleh dlan, mđĭ bi hgŭm hlăm bruă mâo klei găl mkăn msĕ si mnia blei, mtô bi hriăm, kreh knhâo kdrăp mrâo, lŏ hma, mđĭ mjĕ êrô dhar kreh leh anăn mkŏ mnuih ƀuôn sang dua ala čar. Hlăm ai tiê anăn, dua tĭng tŭ ư pŏk ngă klei bhiăn bi hgŭm dua tĭng.