Hlăm klei blŭ hrăm, dua tĭng bi êdah klei hơ̆k mơak kơ klei bi hgŭm jăk siam, klei bi mguôp kluôm dhuôm Việt Nam – Lào ƀrư̆ hruê ƀrư̆ trŭn agha êlam, ba wĭt boh tŭ dưn klă klơ̆ng kơ mnuih ƀuôn sang dua lăn čar, bi yuôm klei bi mguôp kjăp, tŭ dưn plah wah dua Phŭn bruă hŏng tač êngao hlăm wưng êgao.

Bi kơ hdră êlan hlăm wưng kơ anăp, dua tĭng bi tŭ ư mprăp jăk kơ klei bi tuôm khua gĭt gai gưl dlông 3 lăn čar Việt Nam-Lào-Campuchia, Klei kƀĭn kƀĭn tal 47 Dhar bruă mlir knŭk kna dua lăn čar leh anăn ksiêm êmuh bruă kđi čar gưl Khua phŭn bruă hŏng tač êngao Việt Nam – Lào tal 11. K’iăng Khua knŭk kna, Khua phŭn bruă hŏng tač êngao Bùi Thanh Sơn mñă kơ dua tĭng lŏ dơ̆ng bi mguôp kjăp leh anăn bi sa ai hlăm dŭm klei kƀĭn tar rŏng lăn leh anăn hlăm alŭ wăl, mđĭ hĭn bruă kah mbha klei mĭn kơ dŭm boh klei tar rŏng lăn leh anăn hlăm alŭ wăl dôk bi mđing.