Bi ala kơ Khua gĭt gai Đảng, Knŭk kna mpŭ jao Hdră mtrŭn mơ̆ng Anôk dlăng bruă Đảng jao kơ Nguyễn Xuân Thắng, Khua Êpul gơ̆ng hlak mblang gưl dlông wưng 2026 - 2031, Khua gĭt gai Đảng Tô Lâm ksiêm dlăng kơ klei đru mguôp yuôm bhăn mơ̆ng Êpul gơ̆ng hlak mblang gưl dlông dŭm gưl êlâo, boh nik hlăm bruă ksiêm  hriăm, mkŏ mjing bi leh klei mblang mơ̆ng Đảng, kơ êlan truh yang ƀuôn ngă phŭn ti Việt Nam leha năn đru mguôp hlăm bruă mkŏ mjing, bi leh hră mơar yuôm bhăn mơ̆ng Đảng, boh nik hlăm dŭm Klei bi kƀĭn Đảng kluôm ala, tă hdră êlan đĭ kyar mơ̆ng lăn čar hlăm wưng sui.

 Lač kơ  bruă klam hlăm wưng kơ anăp, Khua gĭt gai Đảng mtă kơ Êpul hlak mblang gưl dlông lŏ dơ̆ng bi mklă leh anăn mđĭ bruă klam phŭn hlăm bruă hlak mblang mơ̆ng Đảng, hlăm ênuk đĭ kyar mrâo mơ̆ng lăn čar. Bruă hlak mblang jing yuôm bhăn snăk kyua đru mguôp mkŏ mjing klei mĭn, klei atăt êlan hlăm bruă ngă mơ̆ng Đảng hŏng hnơ̆ng trah dlăng sui, êlan êbat truh hlăm grăp wưng, grăp ênuk čiăng mđĭ kyar lăn čar.