Hdră ksiêm dlăng, ba mdah bruă lŏ wĭt mkŏ dăp dŭm anôk bruă hlăm Đảng, Knŭk kna lehanăn Anôk bruă kƀĭn ala klă klơ̆ng mâo leh Khua Anôk bruă mkŏ mjing Gưl dlông Lê Minh Hưng ba mdah ti Klei bi kƀĭn hruê 1.12 ti anăp 1,3 êklăk čô đảng viên hlăm kluôm ala. Khua anôk bruă mkŏ mjing gưl dlông Lê Minh Hưng ba mdah leh dŭm hdră klă klơ̆ng kñăm mkŏ dăp, bi khuăt dŭm anôk bruă Đảng, Knŭk kna, Anôk bruă kƀĭn ala, Mặt trận čar kwar, dŭm êpul bruă kđi čar – ala ƀuôn lehanăn dŭm êpul hgŭm mâo Đảng, Knŭk kna jao bruă klam… hluê hdră sa anôk bruă ngă lu mta bruă, sa bruă knŏng jao kơ sa anôk bruă kiă kriê lehanăn tŭ đua klan, msir mghaị klei mđĭ mđăl kơ bruă klam, klei kah mbha alŭ wăl, bruă. Dŭm anôk bruă, êpul êya êlâo adih mâo mkŏ dăp brei lŏ ksiêm dlăng jih klei ba mdah, lui jih êpul bruă dôk krah wah. Hluê hdră mkŏ dăp, bi mŭt mbĭt mâo Khua anôk bruă mkŏ mjing gưl dlông ba mdah, srăng dưi bi hrŏ ƀiă êdi 4 anôk bruă Đảng hlăm Gưl dlông, bi hrŏ 5 phŭn bruă, 2 anôk bruă hlăm Knŭk kna, hrŏ 4 dhar bruă mơ̆ng Anôk bruă kƀĭn ala lehanăn 1 anôk bruă hlăm Dhar bruă gĭt gai Anôk bruă kƀĭn ala…

Kơ hdră duh mkra – ala ƀuôn, Khua knŭk kna Phạm Minh Chính brei thâo, hdră duh mkra – ala ƀuôn 11 mlan êgao dưi maoa lu boh tŭ yuôm bhăn hlăm djăp mta ra bruă. Tĭng jih jang 15 hnơ̆ng čuăn dưi mâo lehanăn êgao hdră kčah. Hnơ̆ng đĭ kyar kluôm ala mâo êbeh 7%. Knŭk kna bi mklă thŭn 2025 jing thŭn đĭ kyar, gĭr dưi mâo boh tŭ dưn hlăm dŭm mta kñăm, hnơ̆ng čuăn mơ̆ng hdră kčah 5 thŭn 2021 – 2025. Blŭ hrăm gĭt gai ti anôk bi kƀĭn, Khua gĭt gai Đảng Tô Lâm lač, čiăng dưi mâo mta kñăm mđĭ kyar bruă duh mkra – ala ƀuôn mâo Hdră mtrŭn Klei bi kƀĭn tal XIII kčah mtrŭn, brei drei bi mlih klei mĭn, hdră ngă, gĭr ktưn kpưn đĭ; mtă kơ dŭm gưl, dhar bruă mơ̆ng Gưl dlông truh kơ nah gŭ gĭr hluê ngă kjăp hdră mtrŭn anei, knuă druh, phung khua dŭm gưl, dhar bruă brei ba akŏ, gĭr bi leh jih bruă klam mâo kčah jao. Brei mjing boh kdrŭt kjăp hĭn, ruh mtlaih jih klei dleh dlan, gun kpăk čiăng ba yua jih klei găl mâo lehanăn mtrŭt mđĭ bruă mkra mlih klei ngă hră mơar, mjing wăl anôk jăk găl čiăng mđĭ kyar./.