Wĭt lač klei êmuh jing Khua phŭn bruă Ngăn prăk leh anăn Khua phŭn bruă Kreh knhâo, kdrăp mrâo; phung kiăng Khua knŭk kna, Khua phŭn bruă, khua dhar bruă djŏ tuôm hrăm mbĭt wĭt lač, mblang. Khua knŭk kna Lê Minh Hưng klă klơ̆ng wĭt lač klei êmuh dŭm boh klei hlăm klei đua klam mơ̆ng Knŭk kna. Dŭm mta phŭn hlăm dua êpul klei êmuh mâo leh dŭm čô bi ala anôk bruă kƀĭn ala mđing, blŭ hrăm ti anôk bi trông kơ bruă duh mkra - ala ƀuôn hruê 30 lehanăn 31/10, mâo leh 19 čô bi ala bi trông kơ dŭm boh klei hlăm bruă ngăn prăk, 11 čô bi trông kơ dŭm boh klei hlăm bruă kreh knhâo lehanăn kdrăp mrâo.

Khua bruă kƀĭn ala Trần Thanh Mẫn lač, klei êmuh leh anăn wĭt lač klei êmuh jing hdră ksiêm dlăng klă sĭt, bi êdah klă bruă klam mơ̆ng Bruă kƀĭn ala, Knŭk kna leh anăn dŭm anôk bruă djŏ tuôm ti anăp phung bi ala, mnuih ƀuôn sang kơ bruă hluê ngă dŭm klei ƀuăn, bruă klam dưi jao leh anăn dŭm klei bi mlih leh dŭm klei êmuh êlâo anăn. Klei êmuh tal anei lŏ dơ̆ng bi êdah ai tiê Bruă kƀĭn ala hrăm mbĭt hŏng Knŭk kna, mđing kơ dŭm anôk kpăk, lač klă dŭm klei dleh dlan, gun kpăk, čiăng hmao ruh mgaih, iêo mkrum leh anăn ba yua tŭ dưn dŭm ai dưi, mđĭ hnơ̆ng tŭ jăk, hnơ̆ng đĭ kyar, rơ̆ng klei hơĭt bruă duh mkra kluôm, mđĭ kyar pral, hơĭt kjăp leh anăn mđĭ klei hdĭp mơ̆ng Mnuih ƀuôn sang.