Aguah knhal jih hruê kăm, amai Siu Pin mbĭt hŏng phung hlăm Câu lạc bộ Gang mkhư̆ klei tlĕ čhĭ mnuih să Ia Púch leh anăn knuă druh, lĭng kahan Kđông kahan răng mgang knông lăn Ia Púch nao čuă gŏ sang adei Siu Thảo. Mơ̆ng klei hriăm hră mơar, phung hlăm Câu lạc bộ yăl dliê kơ dŭm klei arăng mplư nao mă bruă ti ala tač êngao, leh kơ anăn arăng mgô̆ mă bruă, ƀơ̆ng ngăn, đa đa arăng akâo prăk mtlaih. Mơ̆ng dŭm klei yăl dliê sĭt, phung hđeh dưi mtô răng ti anăp klei iêu jak mă bruă kƀah klei đăo knang leh anăn dŭm klei bi mjĕ amâo djŏ hlăm hla pŏk yang ƀuôn. Siu Thảo brei thâo, dŭm mmông hâo hưn đru kơ adei thâo săng klă hĭn kơ klei tlĕ čhĭ mnuih leh anăn hdră răng mgang pô:

"Leh hmư̆ klei hâo hưn mơ̆ng phung lĭng kahan răng mgang knông lăn leh anăn phung knuă druh mniê mtô mblang, kâo thâo jing phung ară anei mâo lu hdră êlan kñăm kơ phung êdam êra, msĕ si klei ƀơ̆ng ngăn, amâodah ba nao mă bruă ti ala tač êngao. Mơ̆ng anăn kâo leh anăn phung ƀĭng găp thâo răng kriê pô jăk hĭn."

Mkŏ mjing thŭn 2010 hŏng 40 čô hgŭm, Êpul hgŭm gang mkhư̆ klei tlĕ čhĭ mnuih să Ia Púch krơ̆ng kjăp hdră mtô mblang mđing truh grăp thŭn, mbĭt anăn kah mbha êpul hgŭm nao truh kơ grăp gŏ sang mtrŭt mjhar, mñă kơ mnuih ƀuôn sang. Hŏng klei blŭ Jarai leh anăn dŭm klei yăl dliê klă sĭt jĕ giăm, phung hgŭm đru kơ mnuih ƀuôn sang thâo kral hdră mplư, mplĕ, boh nik klei ƀuăn rơ̆ng bruă mă êdu, prăk mlan lu čiăng ba mnuih kơ ala tač êngao.

Sa hlăm dŭm klei yăl dliê dưi lŏ wĭt lač jing klei truh ti să knông lăn Ia O, čar Gia Lai, hlăk mlan 6/2022. Dưi hmư̆ klei hưn kơ bruă mă ti Tây Ninh hŏng ênoh prăk mlan 20 êklăk prăk, 7 čô hđeh êdam êra mnuih Jrai ti ƀuôn Kloong arăng ba nao kơ Campuchia, mčhua hŏng klei mplư hlăm hla pŏk, arăng ngă jhat leh anăn brei iêo wĭt kơ gŏ sang akâo prăk mnga. Mâo gŏ sang čhĭ lŏ, čan prăk čiăng ba anak wĭt.

Dŭm klei yăl dliê mâo sĭt đru kơ mnuih ƀuôn sang thâo săng klei arưp aram čhĭ mnia mnuih dưi mphŭn mơ̆ng sa klei jak iêu bruă mă, sa klei bi mjĕ hlăm hla pŏk amâodah klei đăo knang ti anăp dŭm klei ƀuăn rơ̆ng jăk siam. Êlâo kơ mă bruă ti kbưi, mnuih ƀuôn sang brei bi klă bruă mă, anôk mă bruă, pô hrŏng ruah; amâo jao hră kak asei kơ mnuih amâo đăo knang leh anăn čŏng hưn hŏng anôk bruă djŏ tuôm tơdah ƀuh klei amâo djŏ.

Amai Siu Pin, Khua êpul hgŭm phung mniê ƀuôn Goòng, să Ia Púch, brei thâo, bruă hâo hưn hŏng klei blŭ djuê ana, mguôp hŏng dŭm boh klei jĕ giăm đru kơ mnuih ƀuôn sang ênưih thâo săng, ênưih hdơr leh anăn mđĭ klei răng.

“Hmei mbĭt hŏng bruă sang čư̆ êa alŭ wăl, mbĭt hŏng phung lĭng kahan, hâo hưn mđĭ klei thâo săng kơ mnuih ƀuôn sang hlăm alŭ, ƀuôn, boh nik phung mniê leh anăn phung hđeh krĭng mnuih djuê ƀiă. Êpul hmei jing bruă klă sĭt hŏng klei hdĭp grăp hruê mơ̆ng mnuih ƀuôn sang, hâo hưn hŏng dua klei blŭ.”

Să Ia Púch bi knông hŏng knông lăn Campuchia, êbeh 70% ênoh mnuih jing mnuih djuê ƀiă. Klei hdĭp mda sa kdrêč mnuih ƀuôn sang dôk dleh dlan, klei dưi thâo săng kơ klei hâo hưn ƀiă, ngă kơ klei arưp aram arăng mplư ăt mâo, boh nik hŏng phung čiăng duah bruă mă kbưi.

Hlăm hdră gang mkhư̆, phung mniê hgŭm mđĭ lar klei găl jĕ giăm, thâo săng klei blŭ leh anăn klei bhiăn alŭ wăl; Lĭng kahan răng mgang knông lăn mkăp klei hâo hưn kơ hdră, klei ngă mơ̆ng phung ngă soh, ktrâo lač kơ mnuih ƀuôn sang thâo kral klei arưp aram leh anăn tui duah klei đru. Dŭm tĭng lŏ bi hgŭm bi trông klei hâo hưn kơ dŭm klei phung mniê, hđeh điêt kbiă mơ̆ng alŭ wăl mâo klei bi knăl amâo jăk čiăng hmao bi mklă.

Thượng úy Phan Đình Duy, Khua êpul mtrŭt mjhar mnuih ƀuôn sang, kđông kahan răng mgang knông lăn Ia Púch, čar Gia Lai, brei thâo, ti alŭ wăl anôk bruă amâo mâo čih yap ôh klei bi mnia mblei mnuih, ƀiădah bruă bi hgŭm hâo hưn, gang mkhư̆ ăt ngă nanao.

"Lĭng kahan knông lăn jêñ jêñ bi mguôp hŏng êpul hgŭm phung mniê să Ia Púch hâo hưn ăt msĕ mơh truh hŏng grăp gŏ sang hâo hưn kơ dŭm hdră êlan. Ară anei, dŭm hdră êlan ngă kơ phung mniê, ba yua klei khăp, mplư, iêu jak, truh kơ klei čhĭ mnuih. Êpul hgŭm phung mniê mâo bruă klam yuôm bhăn snăk."

Mơ̆ng dŭm klei bi blŭ hrăm ti grăp gŏ sang truh kơ klei bi mguôp plah wah phung mniê hlăm êpul leh anăn lĭng kahan răng mgang knông lăn, hdră gang mkhư̆ klei tlĕ čhĭ mnuih ti Ia Púch dôk dưi pŏk ngă mơ̆ng nah gŭ. Êjai mnuih ƀuôn sang thâo kral klei ngă, thâo hdră răng mgang leh anăn čŏng nao hưn mthâo hŏng êpul djŏ tuôm, klei arưp aram arăng mplư, tlĕ čhĭ mnuih dưi gang mkhư̆ mơ̆ng hnưm, đru krơ̆ng kjăp klei êđăp ênang, hơĭt kjăp ti krĭng knông lăn.