Leh knăm tŭ drông, Valentina Matviyenko leh anăn Êpul bi ala gưl dlông Bruă kƀĭn ala Liên bang Russia bi trông leh hŏng Khua Bruă kƀĭn ala Trần Thanh Mẫn leh anăn Êpul bi ala gưl dlông Việt Nam. Dua čô khua gĭt gai tŭ ư bi mklă klei mjĕ giăm mâo mơ̆ng đưm, klei đăo knang, klei thâo săng leh anăn klei mpŭ, bi đru hdơ̆ng găp plah wah Việt Nam leh anăn Russia mâo leh lu ênuk gưl rŭ mdơ̆ng; dua tĭng čiăng lŏ dơ̆ng hyuă kjăp knhuah gru anăn leh anăn lŏ čuê kơ ênuk gưl êdei hluê hŏng dŭm hdră bruă, klei bi mjĕ dhar kreh, mtô bi hriăm, êdam êra leh anăn hiu čhưn ênguê; mđing kơ bruă mtô klei Russia ti Việt Nam, klei Việt Nam ti Russia, đru mguôp hlăm klei đĭ kyar mơ̆ng grăp ala čar leh anăn ngă kdrông mkŏ kơ klei bi mjĕ dua nah.

Dua čô khua gĭt gai bi mklă klei gĭr ba klei bi hgŭm bruă kƀĭn ala nao êlam hĭn, mđĭ klei bi hgŭm plah wah dŭm anôk bruă thơ̆ng, mđĭ lar boh tŭ klei ngă bruă mơ̆ng dŭm êpul phung bi ala bruă kƀĭn ala; mtrŭt mđĭ bi leh klei bhiăn leh anăn ksiêm dlăng hluê ngă klei kuôl kă dua nah, hrăm mbĭt hŏng knŭk kna, alŭ wăl leh anăn anôk bruă duh mkra dua ala čar.