Truh ti kang êlan ƀuôn Canh Tiến, să Canh Vinh, čar Gia Lai, ênai mmuñ hơ̆k mơak mơ̆ng sang hră hđeh điêt kwang ti krah čư̆ dliê. Hlăm adŭ hriăm điêt mâo 32 čô hđeh, diñu tui kdŏ hŏng klei mmuñ mơ̆ng tivi mrâo. Ênai mmuñ, ênai blŭ tlao ƀi kma mbĭt, mkŏ mjing klei jăk mơak êdi. Adei Đinh Thị An, 8 thŭn hơ̆k mơak hưn mthâo:

 “Êlâo dih kâo nao sang hră ka mâo pui kmlă, ară anei mâo leh, mâo doh phưh leh anăn tivi, ƀuh phung mta mtô ênưh thâo săng, mâo dŏ phưh adiê hlơr ƀuh êđăp mơh”.

Mâo leh 2 thŭn dôk ti sang hră krĭng taih kbưi Canh Tiến, nai Nguyễn Thị Mỹ Trinh, 28 thŭn ară anei ăt adôk bi kngar, mgei ai tiê kyua dŭm klei mlih. Amâo mâo hŏng anei amâo mâo sui ôh, anôk anei kƀah wư truh kơ čiăng dlăng tivi kăn mâo lei. Asei ñu pô, dăl hlăm 2 thŭn nao ti sang hră ăt jing klei lông dlăng. 20km mơ̆ng sang hră truh kơ adŭ hriăm êlan jhat, yan hjan đĭ mran, dar êlan lũč lu mmông. Ƀiădah ară anei, grăp hruê nao ti sang hră hŏng ñu jing hruê mơak kyua êlan klông mâo leh klei găl.

 “Mâo êlan mrâo phung nai ênưih hĭn, sang hră lŏ wĭt măl êa mil, mâo pui kmlă đru kơ phung nai leh anăn phung hđeh dưi dlăng tivi, dưi kdŏ mmuñ leh anăn dlăng dŭm hdră jăk hĭn, đru kơ phung nai mtô jăk hĭn”

Amâo djŏ knŏng phung nai mơ̆ng anôk mkăn, lu phung đĭ hriê kơ prŏng ti kroĭng dleh dlan mơ̆ng Canh Tiến ăt lŏ wĭt ti ƀuôn sang đru bi mlih ƀuôn sang pô. Anai Đinh Thị Trang, 22 mrâo hriăm jih ngă leh hră mơar mă bruă ti ƀuôn. Ară anei, leh 2 mlan mă bruă, jing nai kiă kriê adŭ 2C, sang hră gưl 1 Canh Tiến, nai Trang ƀuh klă klei bi mlih, kyua dŭm klei găl sang hră kdlưn hĭn mkă hŏng dŭm thŭn êlâo:

 “Mkă hŏng dŭm thŭn êlâo thŭn anei mâo klei uêñ mĭn mơ̆ng Bruă sang čư̆ êa să, mkăp brei kơ sang hră kdrăp yua, kdrăp hriăm hră kơ phung hđeh sang hră, phung hđeh mâo klei đĭ kyar leh anăn mâo dŭm mta kdrăp yua mrâo hŭn leh anăn diñu amâo lŏ bi kngar ôh. Jing nai čiăng thâo săng leh anăn đru kơ phung hđeh leh anăn mâo lu mmông čiăng kriê dlăng, mtô kơ diñu jêñ jêñ hĭn, mơ̆ng anăn brei diñu mâo tur knơ̆ng čiăng hriăm dŭm klei mrâo hĭn”.

Phung hđeh sang hră mơar, phung nai ăt mơak hĭn ti anăp dŭm klei mlih ti ƀuôn sang Canh Tiến, să Canh Vinh, čar Gia Lai. Ƀiădah hơ̆k mơak hĭn jing phung amĭ ama hđeh, kyua klei găl dưi hlăp lêñ, hriăm hră mơar mơ̆ng anak čô pô dưi mâo djăp, diñu hơĭt ai tiê mă bruă knuă. Đinh Thị Yến, mâo anôk dôk hriăm ti sang hră gưl 1 Canh Tiến brei thâo:

 “Mkă hŏng êlâo dih ară anei jăk hĭn leh, dưi bư̆ mnư̆ leh anăn mâo tivi, phung nao pŏk kơ phung hđeh dlăng lu klei hriăm. Ƀuh anak mniê hriăm mkă hŏng êlâo jăk hĭn, hlăm sang ñu thâo kdŏ mmuñ, răk klei duê mkă hŏng êlâo dih hriăm jăk leh”.

Hlue si Dương Hiệp Hòa, khua Bruă sang čư̆ êa să Canh Vinh, alŭ wăl duh bi liê 300 êklăk prăk kơ 2 sang hră hđeh điêt leh anăn gưl 1 hŏng jih jang 5 adŭ hriăm, đru bi hơĭt klei găl hriăm leh anăn mtô.

 “Hŏng ai tiê đru kơ mnuih ƀuôn sang phung nai ăt dôk leh anăn mâo hdră mtô djŏ hŏng klei čuăn. Hđeh sang hră mơ̆ng Canh Tiến hơ̆k mơak êdi, boh nik thŭn hriăm mrâo anei diñu thâo knăm phŭn pŏk thŭn hriăm, êlâo dih jing kƀah kơ diñu, phung nao bi êdah ai tiê kyua diñu thâo klei kƀah phung hđeh sang hră čiăng dưi bi mbŏ. Anăp anei să mñă lŏ pŏk mlar čiăng mkra mđĭ čiăng rơ̆ng kơ phung hđeh sang hră dưi mâo djăp klei čiăng hriăm leh anăn mtô”.

Ti krah čư̆ dliê, dŭm adŭ hruă mngač ti Canh Tiến ară anei amâo djŏ knŏng jing klei hơ̆k mơak phung hđeh, ƀiădah lŏ jing boh tŭ dưn mơ̆ng klei gĭr amâo mâo mdei mơ̆ng phung nai, mơ̆ng Bruă sang čư̆ êa alŭ wăl leh anăn êpul êya. Canh Tiến ăt msĕ mơh lu krĭng dleh dlan mơ̆ng Gia Lai ăt mâo Knŭk kna duh bi liê hriăm mbĭt, djăp klei găl čiăng ñŭ kma đĭ kyar mbĭt hŏng lăn čar hlăm ênuk mrâo.