Hlăm sa boh sang prŏng mrâo mdơ̆ng dưi ba jao, gŏ sang Rơ Lan Đếu ti ƀuôn Bŏ, să Êa Kly, kdriêk Čư̆ Prŏng hơ̆k mơak drông mnuih ƀuôn sang, găp djuê jĕ giăm taih kbưi hriê čhưn, mơak mbĭt. Klei blŭ tlao mơak mñai bŏ hlăm sang mrâo, bi lar klei mơak dưi kuh kŭm hŏng klei trei mđao. Mơ̆ng anei, gŏ sang ñu mâo leh anôk dôk hơĭt kjăp, mâo anôk tŭk knă êsei djam siam, hdră sang tlô doh, wăl anăp sang mngač tač lehanăn ƀăng jang kjăp.

Boh sang Đếu jing sa hlăm êbeh 1 êbâo boh sang dôk hlăm Hdră msir lăm sang dôk êjai, sang tĭ ƀrôč dưi pŏk ngă ti kdriêk Čư̆ Prŏng hlăm thŭn 2025. Rơ Lan Đếu mgei ai tiê brei thâo, sang mrâo anei jing klei đru mguôp mơ̆ng lu phung mâo ai tiê kmah, klei đru mơ̆ng gŏ sang, găp djuê, mơ̆ng anôk bruă mặt trận, dŭm êpul kđi čar – ala ƀuôn lehanăn êpul kahan alŭ wăl.

 “Kâo mơak êdi. Lač jăk kơ dŭm gưl đru leh prăk kăk, hruê ai mă bruă kơ gŏ sang kâo dưi mdơ̆ng sang mrâo. Ară anei mâo sang leh, kâo gĭr srăng mă bruă kpưn đĭ kyar hĭn”.

Ti kdriêk Čư̆ Prŏng – alŭ wăl mâo lu boh sang dôk êjai, sang tĭ ƀrôč dôk čiăng msir lăm hlăm čar Gia Lai, hdră iêu mtrŭt hruê ai đru bruă mŏng pô sang mbĭt hŏng klei hgŭm kngan mŏng dŭm êpul bruă kđi čar – ala ƀuôn đru ruh mtlaih leh klei dôk mđing uêñ kơ mnuih đru bruă lehanăn đru mtrŭt mđĭ hdră rŭ mdơ̆ng. Anei ăt jing gru hmô mâo kdriêk dôk mđrăm mbĭt pŏk mngă kñăm mđĭ hnơ̆ng hluê ngă bruă, đru kơ mnuih ƀuôn sang hnưm mâo sang dôk mrâo, prŏng siam lehanăn kjăp. Hdră ngă ăt snei, kdriêk Phú Thiên dôk pŏk ngă leh kjăp, mđrăm mbĭt. Alŭ wăl blei mnơ̆ng yua rŭ mdơ̆ng hŏng hnơ̆ng lu čiăng mâo ênoh ênưih ƀiă, lehkơnăn mkăp kơ dŭm să. Hdră rŭ mdơ̆ng mâo dŭm êpul mkŏ mjing hŏng klei khuăt, kjăp, jak iêu lu mnuih thâo kơ bruă nao hgŭm bi đru.

Mơ̆ng anăn, truh kơ ară anei, kdriêk ngă leh hdră kčah, ngă leh jih êlâo kơ wưng kčah mơ̆ng Anôk gĭt gai čar jao; rơ̆ng kơ mnuih ƀuôn sang mâo sang dôk hơĭt kjăp ƀiădah ăt dưi rơ̆ng knhuah gru djuê ana. Nay HDoănh, să Ia Piar, kdriêk Phú Thiện brei thâo klei mơak leh dưi dôk hlăm sang mrâo:

 “Gŏ sang kâo lač jăk kơ Đảng, Knŭk kna lehanăn dŭm gưl lu snăk. Ară anei mâo sang mrâo, kâo hơĭt ai tiê mă bruă, mđing dlăng kơ anak aneh pô”.

Thŭn 2025, mđing truh klei gĭt gai kjăp mơ̆ng Khua knŭk kna, Gia Lai mâo mta kñăm msir lăm 8.485 boh sang dôk êjai, sang tĭ ƀrôč. Leh hdră anei mâo pŏk ngă, Anôk gĭt gai lehanăn êpul đru bruă hdră anei dưi mkŏ mjing, gĭt gai truh kơ grăp anôk bruă, alŭ wăl. Mơ̆ng anăn, hdră anei jak iêu leh klei hgŭm, sa ai mơ̆ng dŭm gưl bruă Đảng, bruă knŭk kna, alŭ wăl, dŭm êpul. Êdah êding jing Kahan ksiêm čar đru mguôp leh prăk kăk, hruê ai mă bruă, bi hgŭm hŏng bruă knŭk kna, mặt trận, êpul êya lehanăn mnuih ƀuôn sang mđĭ klei hluê ngă. Thiếu tướng Rah Lan Lâm-Khua anôk bruă kahan ksiêm čar, Khua anôk gĭt gai hdră msỉ rlăm sang dôk êjai, sang tĭ ƀrôč mơ̆ng kahan ksiêm čar Gia Lai brei thâo:

“Bruă Đảng kahan ksiêm čar pŏk ngă leh tŭ dưn. Knuă druh, lĭng kahan đru 1 hruê prăk mlan mă bruă, đru mguôp êbeh 3 êklai prăk. Mbĭt anăn đru mguôp hruê ai mă bruă, bi hgŭm kjăp hŏng dŭm anôk bruă, alŭ wăl, pŏk ngă kjăp dŭm hdră bruă, lui leh lu gru kruăk hlăm ai tiê mnuih ƀuôn sang”.

Hŏng ai ktang kluôm mbĭt hŏng lu klei mĭn mrâo, truh kơ ară anei čar mâo leh êbeh 82% hdră kčah hlăm bruă rŭ mdơ̆ng lehanăn 42% hdră kčah ba jao. 7/17 alŭ wăl ngă leh hdră kčah mâo: Ƀuôn prŏng Pleiku, wăl krah An Khê, wăl krah Ayŭn Pa, dŭm kdriêk Đăk Pơ, Đức Cơ, Krông Pa lehanăn Phú Thiện. Dŭm alŭ wăl mkăn ăt dôk gĭr bi leh. Đinh Văn Dũng, Khua bruă Đảng kdriêk Čư̆ Prŏng mñă leh klei gĭr mơ̆ng alŭ wăl ăt jing klei gĭr mơ̆ng čar, dưi bi leh êlâo kơ yan hjan thŭn anei:

 “Jih jang boh sang dưi mdơ̆ng djŏ hdră kčah, ênhă mơ̆ng 36m2 kơ dlông. Lu gŏ sang lŏ čan thiăm čiăng mkra sang 60 – 70 m², mâo djăp ênŭm mnư̆, ƀăng jang, dŭm hdră nah tluôn. Truh kơ hruê 30/6, hmei srăng ngă leh 997 boh sang mrâo, rơ̆ng 100% čô mnuih mâo bi mklă đru dưi mâo sang kjăp, boh nik gŏ sang ƀun, giăm ƀun, mđĭ klei hdĭp mnuih ƀuôn sang”.

Klei gĭr, klei mĭn mrâo hlăm bruă pŏk ngă hdră msir lăm sang dôk êjai, sang tĭ ƀrôč ti Gia Lai klă sĭt ba wĭt boh tŭ dưn. Sa hdră rŭ mdơ̆ng sang mrâo kơ gŏ sang ƀun dơ̆ng truh leh hruê dưi ngă ênŭm jih, đru kơ krĭng ƀuôn sang, boh nik krĭng mnuih djuê ƀiă ti Gia Lai ƀrư̆ hruê ƀrư̆ mlih mrâo siam./.